उरुळी कांचन, (पुणे) : पुणे-सोलापूर महामार्गावर उरुळी कांचन हद्दीतील खेडेकर मळा परिसरात भरधाव अज्ञात वाहनाने दुचाकीला दिलेल्या जोरदार धडकेत एका तरुणाचा जागीच मृत्यू झाला. तर दुसरा तरुण गंभीर जखमी झाला आहे. अपघात घडल्यानंतर वाहनचालक कोणतीही मदत न करता घटनास्थळावरून पसार झाला.
श्रावण सुरेश कतारी (वय वर्ष – तरुण, रा. यवत, ता. दौंड) असे मृत पावलेल्या तरुणाचे नाव आहे, तर रोहित बाळू काळे (रा. यवत, ता. दौंड) असे गंभीर जखमी झालेल्या तरुणाचे नाव आहे.
मिळालेल्या माहितीनुसार, श्रावण कतारी आणि रोहित काळे हे दोघे मित्र आपल्या दुचाकीवरून पुण्याच्या बाजूकडून घराकडे (यवतकडे) निघाले होते. सोमवारी पहाटे तीन ते साडेतीन वाजण्याच्या सुमारास त्यांची दुचाकी उरुळी कांचन हद्दीतील खेडेकर मळा परिसरातील ‘मातोश्री हॉटेल’ समोर आली.
त्यावेळी पाठीमागून किंवा समोरून भरधाव वेगात आलेल्या एका अज्ञात वाहनाने त्यांच्या दुचाकीला जोरदार धडक दिली. धडक इतकी भीषण होती की, दुचाकीवरील दोन्ही तरुण रस्त्यावर फेकले गेले. या अपघातात श्रावण कतारी यांना डोक्याला व शरीरास गंभीर दुखापत झाल्याने त्यांचा जागीच मृत्यू झाला, तर रोहित काळे यांच्या पायाला व शरीराला गंभीर दुखापत होऊन ते रक्तबंबाळ झाले.
अपघाताची माहिती मिळताच कस्तुरी रुग्णवाहिकेचे संतोष झोंबाडे, रतन चव्हाण आणि माऊली लाड यांनी तात्काळ घटनास्थळी धाव घेतली. त्यांनी तातडीने दोन्ही अपघातग्रस्तांना उरुळी कांचन येथील सिद्धिविनायक रुग्णालयात उपचारासाठी दाखल केले. मात्र, रुग्णालयात पोहोचण्यापूर्वीच श्रावण कतारी यांचा मृत्यू झाल्याचे डॉक्टरांनी घोषित केले. गंभीर जखमी झालेल्या रोहित काळे यांच्यावर सध्या रुग्णालयात उपचार सुरू आहेत. दरम्यान, अपघात झाल्यानंतर अंधाराचा फायदा घेऊन अज्ञात वाहनचालक आपली गाडी घेऊन घटनास्थळावरून फरार झाला.
