पुणे : केतन अग्रवाल हत्या प्रकरणातील न्यायालयीन सुनावणीला अखेर सुरुवात झाली आहे. मावळमधील वडगाव न्यायालयात झालेल्या सुनावणीदरम्यान आरोपींच्या वतीने 2 जामीन अर्ज दाखल करण्यात आले. मात्र, सरकारी पक्षाचे म्हणणे ऐकून घेतल्याशिवाय या अर्जांवर निर्णय घेऊ नये, अशी मागणी सरकारी वकील उज्ज्वल निकम यांनी केली. त्यामुळे आता 17 नोव्हेंबर रोजी होणाऱ्या पुढील सुनावणीकडे लक्ष लागले आहे.
आजच्या सुनावणीसाठी सरकारी वकील उज्ज्वल निकम न्यायालयात उपस्थित होते. सरकारी पक्षाने खटल्याची प्रक्रिया सुरू करण्याची विनंती केली. त्यानुसार न्यायालयात आरोपींवरील आरोप निश्चित करण्याची प्रक्रिया सुरू करण्यात आली. याचवेळी आरोपींच्या वकिलांनी 2 जामीन अर्ज सादर केले. या अर्जांवर सरकारी पक्षाला बाजू मांडण्याची संधी दिल्यानंतरच विचार व्हावा, अशी भूमिका निकम यांनी मांडली. सुनावणीदरम्यान सिया आणि चेतन हे दोघे ऑनलाइन पद्धतीने उपस्थित होते.
या प्रकरणातील तिसरा सहआरोपी रितेश हंगे याच्यासाठी अद्याप वकिलाची नियुक्ती झालेली नाही. त्यामुळे त्याला स्वतःचा वकील नेमण्यासाठी वेळ द्यावा, अशी भूमिका सरकारी पक्षाने घेतली. त्याने वकील नेमला नाही, तर न्यायालयाकडून त्याला कायदेशीर मदत उपलब्ध करून दिली जाईल, असेही सांगण्यात आले. आता 17 नोव्हेंबरला जामीन अर्जांवर पुढील सुनावणी होण्याची शक्यता आहे.
पोलिसांच्या आरोपानुसार, उच्चशिक्षित तरुण केतन अग्रवाल याला 18 जून रोजी लोहगड किल्ल्यावरून दरीत ढकलण्यात आले. या प्रकरणात त्याची होणारी पत्नी सिया गोयल आणि चेतन चौधरी यांच्यावर आरोप आहेत. नोव्हेंबरमध्ये उदयपूर येथे दोन्ही कुटुंबांकडून त्यांच्या लग्नाची तयारी सुरू होती. त्यांचा साखरपुडाही झाला होता.
तपास यंत्रणेच्या आरोपानुसार, सियाने ट्रेकिंगच्या बहाण्याने केतनला लोहगडावरील कमी वर्दळीच्या ठिकाणी नेले. तेथे ती त्याच्याशी बोलत असताना चेतनने मागून येऊन केतनला दरीत ढकलल्याचा आरोप आहे. या प्रकरणाचा खटला आता सुरू झाला असून, पुढील सुनावणीत काय घडते, याकडे सर्वांचे लक्ष आहे.
