सोलापूर : सातबारावरील चूक दुरुस्त करून देण्यासाठी १५ हजार रुपयांची लाच स्वीकारताना उत्तर तहसील कार्यालयातील लिपिकाला लाचलुचपत प्रतिबंधक विभागाने तहसील कार्यालयातच रंगेहाथ पकडले. अतुल अशोक रणसुबे (वय ४१) असे रंगेहाथ पकडलेल्या लिपिकाचे नाव आहे.
मिळालेल्या माहितीनुसार, अतुल रणसुबे हा उत्तर तहसील कार्यालयात लिपिक या पदावर कार्यरत आहे. तक्रारदाराची जमीन राष्ट्रीय महामार्गासाठी संपादित झाली होती. पण, सातबारा उताऱ्यावर दाखविलेली जमीन आणि प्रत्यक्षात संपादित झालेली जमीन, यात तफावत होती. त्याबद्दल तक्रारदाराने तहसील कार्यालयाकडे अर्ज केला होता. वारंवार हेलपाटे मारूनही त्यांच्या अर्जाची कोणीच दखल घेत नव्हते.
ती चूक दुरुस्त करून देण्यासाठी लिपिक रणसुबे याने तक्रारदाराकडे १५ हजार रुपयांची लाच मागितली होती. गुरुवारी (ता. १८) लाचेची रक्कम रणसुबे याने तक्रारदाराकडून तहसील कार्यालयातच स्विकारली. पण, लाचलुचपत प्रतिबंधक विभाग त्यावर लक्ष ठेवून होते. पैसे हातात घेताच लाचलुचपत प्रतिबंधक विभागाने त्याला पकडले. त्याच्याविरूद्ध सदर बझार पोलिसांत गुन्हा दाखल करण्यात आला आहे.
दरम्यान, अतुल रणसुबे याने पुणे विभागीय आयुक्त कार्यालयात लिपिक या पदावर काम केले आहे. नुकतीच त्याची सोलापूर उत्तर तहसील कार्यालयातील बदली झाली होती. लाचलुचपत विभागाचे वरिष्ठ पोलिस निरीक्षक उमाकांत महाडिक यांच्या पथकाने उप अधीक्षक गणेश कुंभार यांच्या मार्गदर्शनाखाली ही कारवाई केली. या कारवाईने पुणे विभागीय आयुक्त कार्यालयात खळबळ उडाली आहे.
