चाकण, (पुणे) : प्रवास करताना महिलांच्या गळ्यातील दागिने हिसकावून पळणाऱ्या टोळीच्या मुसक्या आवळण्यात स्थानिक गुन्हे अन्वेषण (ग्रामीण) पोलिसांना यश आले आहे. याप्रकरणी चौघांना अटक करण्यात आल्याची माहिती स्थानिक गुन्हे शाखेचे वरिष्ठ पोलीस निरीक्षक अविनाश शिळीमकर यांनी दिली.
अनिकेत गोपाळ सुरवसे (वय – 22) व हर्ष सतिश जाधव (वय 23) यांना अटक करण्यात आली आहे . त्यांच्या चौकशीतून आणखी दोन साथीदार आकाश सतिश बिरादार व सुदर्शन नामदेव यादव (रा. सर्वजण मांजरी) अशी अटक करण्यात आलेल्या आरोपींची नावे आहेत. या आरोपींनी एकूण तीन गुन्हे केल्याची कबुली पोलिसांना दिली असून त्यांच्याकडून पोलिसांनी 3 लाख 47 हजार रुपयांचे सव्वा चार तोळे सोन्याचे दागिने, दोन पल्सर मोटारसायकली असा मुद्देमाल जप्त करण्यात आला आहे.
पोलिसांनी दिलेल्या माहितीनुसार, २५ मे २०२५ रोजीराजगड पोलीस ठाण्याच्या हद्दीत फिर्यादी केशर कुशल भोईर (वय 31, व्यवसाय शिक्षक, रा. धोंडपाडा, ता. पेण, जि. रायगड) या आपल्या नातेवाइकांसह मांढरदेवी दर्शनासाठी आल्या होत्या. शिवरे, (ता. भोर) येथील एपीसीएल सीएनजी पंपावर थांबल्या असता, मोटारसायकलवर आलेल्या दोन अज्ञात व्यक्तींनी त्यांच्या गळ्यातील व कानातील दागिने हिसकावून पळ काढला होता. त्यानुसार भा.दं.वि. अंतर्गत गुन्हा दाखल करण्यात आला होता.
स्थानीक गुन्हे शाखेच्या पथकाने घटनास्थळी आणि परिसरातील सीसीटीव्ही फुटेज तपासून गोपनीय बातमीदारांकडून माहिती प्राप्त करण्यात आली. गुन्हयात वापरलेली मोटार सायकल ही अनिकेत सुरवसे (रा. ए.एम. कॉलेज समोर, मांजरी पुणे )याचेजवळ असून तो हिंजवडी परिसरात असल्याची गोपनीय माहिती पोलिसांना मिळाली.
मिळालेल्या गोपनीय माहितीवरून, हिंजवडी परिसरातून आरोपींना अटक करण्यात आली. अटक करण्यात आलेल्या आरोपींपैकी आकाश बिरादार आणि हर्ष जाधव यांना विश्वासात घेवून चौकशी केली असता त्यांनी यवत व बारामती तालुक्यातील पोलीस ठाण्यांच्या हद्दीत देखील अशाच प्रकारचे गुन्हे केल्याची कबुली पोलिसांना दिली आहे. पुढील तपास राजगड पोलीस करत असून, आरोपींना न्यायालयीन कोठडी सुनावण्यात आली आहे.
ही कामगिरी पोलीस अधीक्षक पंकज देशमुख, अपर पोलीस अधीक्षक गणेश बिरादार, उपविभागीय पोलीस अधिकारी तानाजी बरडे यांच्या मार्गदर्शनाखाली स्थानिक गुन्हे शाखेचे पोलीस निरीक्षक अविनाश शिळीमकर, राजगड पोलीस स्टेशनचे पोलीस निरीक्षक राजेश गवळी, स्थानिक गुन्हे शाखेचे सहायक पोलीस निरीक्षक दत्ताजीराव मोहिते, पोलीस अंमलदार अमोल शेडगे, मंगेश भगत, धीरज जाधव, राजु मोमीण, अजय घुले, योगेश नागरगोजे, श्रेणी पोसई ईश्वर जाधव, हनुमंत पासलकर, तुषार भोईटे, बाळासाहेब खडके, वैभव सावंत, राहुल घुबे, राहुल पवार, समाधान नाईकनवरे, रणजित कोंडके, अतुल फरांदे, दगडु विरकर, तसेच राजगड पोलीस ठाण्याचे पोसई अजित पाटील, अंमलदार अक्षय नलावडे यांनी केली असून पुढील तपास राजगड पोलीस स्टेशन करत आहेत.
