परभणी : राज्यामध्ये मराठा आरक्षणाचा मुद्दा चांगलाच गाजत आहे. मागील काही दिवसांपासून हा लढा सुरु असून आरक्षणासाठी राज्यात अनेकांनी जीवनयात्रा संपवली आहे. दरम्यान, विधानसभेसाठी झालेल्या मतदानात मराठा आरक्षणाला विरोध असल्याचे कारण सांगत जिंतूर तालुक्यातील एका तरुणाने गळफास घेत जीवनयात्रा संपवल्याची धक्कादायक घटना समोर येत आहे. हि घटना गुरुवारी (दि.21) रात्री उशीरा उघडकीस आली आहे. या घटनेमुळे तालुक्यातील मराठा आरक्षणाचा सहावा बळी ठरला आहे.
विनायक शिंदे (वय-30) असे आत्महत्या केलेल्या तरुणाचे नाव आहे.
मिळालेल्या माहितीसाठी, जिंतूर तालुक्यातील सोस येथील विनायक शिंदे या तरुणाचा मागील वर्षापासून मराठा आरक्षम आंदोलनात सक्रिय सहभाग होता. त्यामुळे आरक्षण मिळेल की नाही, या विवंचनेत तो होता. यातूनच त्याने गावालगत असलेल्या एका शेतात झाडाला गळफास घेऊन आत्महत्या केली आहे. विनायक शिंदेंनी आत्महत्या करण्यापूर्वी चिठ्ठी लिहिलेली आढळून आली आहे. या चिठ्ठीत त्याने लिहिलयं की, “निवडणुका झाल्या तरी मराठा आरक्षण मिळाले नाही, त्यामुळे मी आत्महत्या करत आहे. याला मी स्वत: जबाबदार आहे”, असा मजकूर त्या चिठ्ठीत लिहिला आहे.
ही घटना नातेवाईकांना समजताच पोलीसांना घटनेची माहिती देण्यात आली. यावेळी पोलीसांनी घटनास्थळी जाऊन पंचनामा केला. तसेच मृत व्यक्तीचे ग्रामीण रुग्णालयात शवविच्छेदन करण्यात आले. या घटनेची नोंद चारठाणा पोलीसांत करण्यात आली. याप्रकरणी पुढील तपास पोलीस करीत आहे.
