लोणी काळभोर: विवाहितेचा शाररीक व मानसिक छळ करून जीवे ठार मारण्याची धमकी दिल्याची घटना घडली आहे. याप्रकरणी पतीसह सासरकडील 5 जणांवर लोणी काळभोर पोलीस ठाण्यात गुन्हा दाखल करण्यात आला आहे.
पती तिरुपती विनायक चव्हाण (वय 28), सासू सखुबाई विनायक चव्हाण (वय 45), सासरे विनायक गंगाराम चव्हाण (वय 50, रा. मु.पो. हळद वाढवण, ता. जळकोट, जि. लातुर), नंणद पुष्पा इंद्रजित कोकले (वय 29, रा. मांडणी ता. अहमदपुर जि. लातुर) व प्रणिता हनमंत इंगळे (वय 26, रा. मांजरी बु. ता. हवेली जि.पुणे) अशी गुन्हा दाखल करण्यात आलेल्या सासरकडील मंडळींची नावे आहेत. याप्रकरणी 29 वर्षीय विवाहितेने लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी या परिचारिका असून लोणी काळभोर परिसरातील एका दवाखान्यात काम करतात. फिर्यादी आणि आरोपी तिरुपती चव्हाण यांचा विवाह झाला आहे. त्यांना एक अपत्य देखील झाले. त्यानंतर काही दिवस उलटल्यानंतर आरोपींनी फिर्यादी यांना त्रास देण्यास सुरुवात केली. तसेच आरोपींनी फिर्यादी यांना शिवीगाळ मारहाण करुन जीवे मारण्याची धमकी देखील दिली.
दरम्यान, आरोपींनी फिर्यादी यांना एप्रिल 2018 ते 26 डिसेंबर 2024 या कालावधील हळद वाढवण, येलदरा (ता. जळकोट जि. लातुर), म्हसोबा वस्ती विठ्ठल मंदिरामागे (मांजरी ब्रु. ता. हवेली जि.पुणे) येथे भांडण करून शाररीक व मानसिक त्रास दिला. या वारंवार होणाऱ्या त्रासाला कंटाळून फिर्यादी यांनी लोणी काळभोर पोलीस ठाण्यात धाव घेतली आणि आरोपींच्या विरोधात तक्रार दिली.
त्यानुसार सासरकडील 5 जणांच्या विरोधात भारतीय न्याय संहीता कलम 85,115(2) 352,351 (2) (3),351 (4) 3(5) प्रमाणे गुन्हा दाखल करण्यात आला आहे. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस उपनिरीक्षक पूजा माळी करीत आहेत.
