छत्रपती संभाजीनगर : शहरातील मिसारवाडी परिसरात जन्मदात्या पित्याने स्वतःच्या मुलीचा अमानुष छळ केल्याचा गंभीर प्रकार समोर आला आहे. या प्रकरणी सिडको पोलीस ठाण्यात वडिलांविरोधात गुन्हा दाखल करण्यात आला आहे. मुलीचे कपडे जबरदस्तीने काढणे, तिच्या अंगावर थंड पाणी टाकणे, हातापायांना सिगारेटचे चटके देणे आणि डोक्याच्या मागील बाजूचे केस जबरदस्तीने कापल्याचा आरोप करण्यात आला आहे.
मिळालेल्या माहितीनुसार, २५ ऑक्टोबरच्या मध्यरात्री दोन ते तीन वाजण्याच्या सुमारास आरोपी शफिक चाँद शहा याने मुलीचा छळ केल्याची तक्रार आहे. आरोपीने मुलीचे कपडे जबरदस्तीने काढून तिच्या अंगावर थंड पाणी टाकल्याचा आरोप आहे. त्यानंतर तिच्या हातापायांना सिगारेटचे चटके देण्यात आले, तसेच डोक्याच्या मागील बाजूचे केसही जबरदस्तीने कापल्याचे तक्रारीत नमूद आहे. या प्रकारामुळे मुलगी भयभीत झाल्याचे सांगण्यात येत आहे.
या घटनेनंतर पीडित मुलीच्या भावाने पुढाकार घेत सिडको पोलीस ठाण्यात तक्रार दाखल केली. तक्रारीच्या आधारे पोलिसांनी आरोपी वडिलांविरोधात संबंधित कलमांनुसार गुन्हा दाखल केला आहे. पोलीस उपनिरीक्षक नरळे या प्रकरणाचा पुढील तपास करत आहेत.
