पिंपरी चिंचवड : चिंचवडच्या तळवडेमधील अनधिकृत ‘स्पार्कल’ कँडल तयार करणाऱ्या कारखान्यातील स्फोटात सहा महिला कामगारांचा शुक्रवारी होरपळून मृत्यू झाल्याची घटना घडली. त्या घटनेतील दहा जखमी रुग्णांवर ससून रुग्णालयात उपचार सुरू असून त्यापैकी शनिवारी २ जणांचा मृत्यू झाला आहे. तर आठ जणांची प्रकृती चिंताजनक असल्याचे रुग्णालयामार्फत कळविण्यात आले आहे.
यावेळी ससून रुग्णालयाचे अधिष्ठाता विनायक काळे म्हणाले की, पिंपरी चिंचवड येथील यशवंतराव चव्हाण रुग्णालयामधून शुक्रवारी रात्री दहा रुग्णांना उपचारासाठी पाठविण्यात आले. त्या उपचारादरम्यान शनिवारी सकाळी एक आणि दुपारच्या सुमारास एक अशा दोन रुग्णांचा मृत्यू झाल्याची घटना घडली आहे. तर उर्वरित ८ रुग्णांच्या फुप्फुसाची मोठ्या प्रमाणावर हानी झाली आहे. त्यामुळे सर्व रुग्णांची प्रकृती चिंताजनक असल्याचे काळे सांगितले.
