डोर्लेवाडी (पुणे) : जगद्गुरू संत श्री तुकाराम महाराज यांचा ३७६ वा बीज सोहळा बुधवारी (ता. २७) मोठ्या आनंदात प्रती देहू समजल्या जाणाऱ्या डोर्लेवाडीत (ता. बारामती) पार पडला. तुकोबांच्या या सोहळ्यात सहभागी होण्यासाठी पुणे, सोलापूर, सातारा जिल्ह्यातील लाखोंच्या संख्येने वारकरी डोर्लेवाडीत सहभागी झाले होते.
बरवें देशवासी झाला। काय बोलता, बोलता?
लाभ लाभ दुप्पट. जिवा झाला दारुषाने॥
सुदैवाने मला संतांची भेट झाली. ते प्रेमाचे पोट होते.
मी तुझ्यासाठी खूप मेहनत घेतली आहे. अवघा फळाला आला…
यंदाचे बीज सोहळ्याचे ३७६ वर्षे आहे. या निमित्ताने डोर्लेवाडी परिसरातील, जिल्ह्यातील व राज्याच्या कानाकोपऱ्यातून लाखो वारकरी दाखल झाले होते. मंदिरात टाळ-मृदंगाच्या तालात अखंड हरिनामाचा गजर सुरु झाला अन् पुंडलिक वरदा हरी विठ्ठलचा जयघोष होताच उपस्थित हजारो भाविकांनी श्रींच्या मूर्तीवर गुलाल पुष्प वर्षाव करून संत तुकाराम बीजेचा सोहळा साजरा केला. प्रती देहू समजल्या जाणाऱ्या येथील संत तुकाराम महाराज मंदिर परिसरात लाखो भाविकांनी ‘याची देही याची डोळा’ बीजेचा सोहळा अनुभवला.
देवस्थान समिती व सांप्रदायिक भजनी मंडळाच्या वतीने बीज उत्सव सोहळ्यानिमित्त आठ दिवसांपासून कीर्तन महोत्सवाचे आयोजन करण्यात आले होते. पहाटेच मंदिरात आकर्षक फुलांची सजावट करण्यात आली होती. सकाळी महाभिषेक झाल्यानंतर बाळासाहेब नाळे महाराज यांचे प्रवचन झाले. त्यानंतर महाराज लक्ष्मण महाराज कोकाटे यांचे बीजेनिमित्त फुलाचे कीर्तन झाले. कीर्तनात त्यांनी संत तुकाराम महाराज यांचे जीवनचरित्र व त्यांनी समाजासाठी केलेल्या अलौकिक कार्याचे वर्णन केले. दुपारी १२ वाजता अखंड हरिनामाचा गजर झाला. त्याचबरोबर अत्यंत जड अंतःकरणाने भाविकांनी गुलाल पुष्प वर्षाव करून बीजेचा सोहळा साजरा केला.
पुणे, सोलापूर, सातारा जिल्ह्यातून लाखो भाविक दर्शनासाठी दरवर्षी येतात. भाविकांना उन्हाचा त्रास होऊ नये यासाठी देवस्थान समिती व ग्रामस्थांच्या वतीने संपूर्ण मंदिर परिसरात भव्य मंडप टाकण्यात आले होते. ग्रामपंचायतीच्या वतीने गावातील स्वच्छता, रस्ते दुरुस्ती तसेच शुद्ध पाण्याची सोय करण्यात आली होती. बारामती शहर पोलिसांच्या वतीने मोठा बंदोबस्त ठेवण्यात आला होता. प्राथमिक आरोग्य केंद्राच्या वतीने भाविकांची मोफत आरोग्य तपासणी करून औषधोपचार करण्यात आले. सामाजिक संस्था व स्थानिक पदाधिकारी यांच्यावतीने मोफत पाण्याची व्यवस्था करण्यात आली होती.
खासदार सुप्रिया सुळे यांनी तुकाराम बीजेच्या निमित्ताने कार्यक्रमाला हजेरी लावली. त्या पाठोपाठ यावर्षी सुनेत्रा पवार यांनीदेखील या कार्यक्रमाला उपस्थिती दर्शवली. सामाजिक कार्यकर्ते अजित जाधव यांनी संत तुकाराम महाराज यांच्या चरणी १ लाख रुपये किंमतीचा सोन्याचा मुखूट अर्पण केला. तसेच पुणे येथील प्रसिद्ध उद्योजक गणेश जाधव यांच्याकडून महाप्रसादाचे आयोजन करण्यात आले होते.
दरम्यान, येथील यात्रेला त्यांचे पै-पाहुणे, माहेरवासीनी दरवर्षी आवर्जून येतात. मंदिरात दर्शनासह यात्रेचा आनंद कुटुंबासह लुटतात. गावात अनेक वर्षांपासून हिंदू-मुस्लिम एकत्र नांदत असल्याने यात्रेच्या निमित्ताने राष्ट्रीय एकात्मतेचे दर्शन घडते.
