न्हावरे(पुणे) : न्हावरे (ता.शिरूर) येथे न्हावरे-शिक्रापूर राष्ट्रीय महामार्गावर सरके-साठेवस्ती नजिक रविवारी(दि. 23)रात्री साडेसात वाजण्याच्या सुमारास कंटनेर व स्विफ्ट गाडी यांच्यात समोरासमोर जोरदार धडक होऊन झालेल्या भीषण अपघातात एकाच कुटुंबातील तिघेजण जागीच ठार झाले आहेत.
या अपघातात कैलास उर्फ दादा कृष्णाजी गायकवाड(वय- 50 वर्ष), गौरी कैलास गायकवाड (वय- 18 वर्ष) गणेश महादेव निर्लेकर(वय- 25वर्ष) हे तिघेजण जागीच ठार झाले आहेत. तर दुर्गा कैलास गायकवाड (वय- 45वर्ष) ही महिला गंभीर जखमी झाली आहे.
घटनेची सविस्तर माहिती अशी की, कैलास गायकवाड हे आपल्या चारचाकी वाहनातून तळेगावहून न्हावऱ्याकडे येत असताना, त्यांच्या स्विफ्ट गाडीला कंटनेरने जोरदार धडक दिली. या अपघातात कैलास गायकवाड व त्यांची मुलगी गौरी गायकवाड तसेच जवळचे नातलग गणेश निर्लेकर जागीच ठार झाले तर कैलास गायकवाड यांच्या पत्नी दुर्गा कैलास गायकवाड गंभीर जखमी झाल्या आहेत.
एकाच कुटुंबातील तिघांच्या भीषण अपघाती निधनामुळे परिसरात हळहळ व्यक्त केली जात आहे. घटनेचा पुढील तपास पोलिस निरीक्षक संदेश केंजळे यांच्या मार्गदर्शनाखाली न्हावरे पोलीस करत आहेत. मृतांना शवविच्छेदनासाठी न्हावरे येथील ग्रामीण रुग्णालयात दाखल करण्यात आले. तर जखमी महिलेवर खासगी रुग्णालयात उपचार सुरू आहेत.
