मांडवगण फराटा, (पुणे) : घरातील छताच्या लोखंडी अँगलला ओढणीच्या साहाय्याने एका अल्पवयीन मुलीने गळफास घेत आत्महत्या केल्याची धक्कादायक घटना घडली आहे. मोनिका मदन खिलारे (वय-१७) असं आत्महत्या केलेल्या शाळकरी मुलीचे नाव आहे.
ही घटना कुरुळी (ता. शिरूर) येथे गुरुवार (दि. २०) रोजी दुपारच्या सुमारास उघडकीस आली. याप्रकरणी वडील मदन निवृत्ती खिलारे (सध्या रा. कुरुळी, मूळ रा. खडकी सदार, ता. रिसोड, जि. वाशिम) यांनी मांडवगण फराटा दूरक्षेत्र येथे फिर्याद दिली आहे.
पोलिसांनी दिलेल्या माहितीनुसार, मोनिका खिलारे ही कुटुंबासोबत कुरुळी येथे राहण्यास आहे. मोनिकाने राहत्या घरात ओढणीच्या साहाय्याने लोखंडी अँगलला गळफास घेत आपली जीवन यात्रा संपवली. तिचे वडील दुपारच्या सुमारास विळा आणण्यासाठी घरी आले होते. त्यावेळी मुलीने घराचा दरवाजा उघडला नाही. त्यामुळे ही घटना उघडकीस आली.
दरम्यान, मोनिकाला उपचारासाठी शिरूर ग्रामीण रुग्णालयात दाखल करण्यात आले, मात्र, डॉक्टरांनी उपचारापूर्वीच तिला मृत घोषित केले. मांडवगण फराटा पोलिसांनी सदर घटनेत आकस्मिक मृत्यूची नोंद केली असून पुढील तपास पोलिस निरीक्षक जोतीराव गुंजवटे यांच्या मार्गदर्शनाखाली पोलिस नाईक अमोल गवळी करत आहेत.
