उरुळी कांचन, (पुणे) : कानगाव (ता. दौंड) ग्रामपंचायत हद्दीत दरोडा टाकण्याच्या उद्देशाने दबा धरून बसलेल्या दोघांना यवत व स्थानिक गुन्हे शाखेच्या पोलिसांनी बेड्या ठोकल्या आहेत. याप्रकरणी पोलिसांनी दोघांना अटक केली असून तिघांवर गुन्हा दाखल केला आहे. त्यांच्याकडून पोलिसांनी 10 तोळे वजनाचे सोन्याचे दागिने, मोटारसायकली असा एकुण 8 लाखांचा मुद्देमाल हस्तगत केला आहे.
सिध्दू रसिकलाल चव्हाण (वय -19, रा. इनामगाव, ता. शिरूर, जि. पुणे) व बाबुशा गुलाब काळे (वय – 21, रा. शेडगाव, ता. श्रीगोंदा, जि. अहमदनगर), अशी अटक करण्यात आलेल्या आरोपींची नावे आहेत. तर प्रशांत फोटया उर्फ बंडू काळे, हनुमंत फोटया उर्फ बंडू काळे (रा. दोघेही, राक्षसवाडी, ता. कर्जत, जि. अहमदनगर) दिपक रसिकलाल चव्हाण (रा. इनामगाव, ता. शिरूर, जि. पुणे)अशी गुन्हा दाखल करण्यात आलेल्या आरोपींची नावे आहेत. आरोपींनी उरुळी कांचन, यवत आणि दौंड पोलीस स्टेशन हद्दीत जबरी चोरी, घरफोडीचे 20 गुन्हे केल्याची कबुली पोलिसांना दिली आहे.
पोलिसांनी दिलेल्या माहितीनुसार, कानगाव हद्दीत रेल्वेपुलाजवळ शुक्रवारी (ता. 14) रात्री साडेनऊ वाजण्याच्या सुमारास हे इसम हत्यारे व मोटार सायकली घेऊन दरोडा घालण्याच्या तयारीत असल्याची माहिती यवत पोलिसांना मिळाली होती. त्यानुसार यवत पोलिसांचे पथक व गुन्हे शोध पथक यांनी सदर ठिकाणी जाउन पाहणी करण्यास सुरुवात केली. यावेळी दरोडेखोरांनी गावातील लोक येत असल्याचे पाहून स्वतःच्या दोनमोटार सायकलला आग लावून पळून जाऊ लागले.
यावेळी पळून जाताना पोलिसांनी एकाला पकडले. त्यांच्याकडे चौकशी केली असता त्याने त्याचे नाव सिध्दू चव्हाण असल्याचे सांगितले. त्याची अंगझडती घेतली असता त्याच्याकडे लोखंडी कोयता मिळुन आला. त्यास त्याच्याबरोबर असलेल्या इतर साथीदारांबाबत विचारले असता त्याने त्यांची नावे वरीलप्रमाणे सांगितली. पळुन गेलेल्या आरोपिंचा शोध घेत असताना पोलिसांनी बाबुशा काळे हा दौंड पोलीस स्टेशन हद्दीत मिळुन आला.
दरम्यान, त्याच्याकडे चौकशी केली असता त्याने सर्वजण कानगांव येथे दरोडा टाकण्याच्या उद्देशाने आलो होतो. तसेच अंधार होण्याची वाट पाहत असल्याची माहिती पोलिसांना दिली. सदर गुन्ह्याचा तपास करत असताना त्यांच्याकडे चौकशी केली असता त्यांनी यवत, दौंड, उरुळी कांचन पोलीस स्टेशन हद्दीत रात्रीच्यावेळी घरफोड्या, दरोडा, जबरी चोऱ्या केल्या असल्याचे सांगितले. त्यांच्याकडून पोलिसांनी 10 तोळे वजनाचे सोन्याचे दागिने, मोटारसायकली असा एकुण 8 लाखांचा मुद्देमाल जप्त केला आहे.
सदरची कामगिरी स्थानिक गुन्हे शाखेचे पोलीस निरीक्षक अविनाश शिळीमकर, यवत पोलीस स्टेशनचे पोलीस निरीक्षक नारायण देशमुख यांच्या मार्गदर्शनाखली सहायक पोलीस निरीक्षक राहुल गावडे, पोलीस उपनिरीक्षक सलीम शेख, किशोर वागज, सहा.फौजदार महेंद्र फणसे, पोलीस हवालदार कानिफनाथ पानसरे, हिरालाल खोमणे, गुरूनाथ गायकवाड, संदीप देवकर, महेंद्र चांदणे, अक्षय यादव, रामदास जगताप, विकास कापरे, मारुती बाराते, गणेश मुटेकर तसेच स्थानिक गुन्हे शाखेचे पोलीस हवालदार सचिन घाडगे शेख, अजित भुजबळ, योगेश नागरगोजे, विजय कांचन, राजु मोमीण यांनी केलेली आहे. आरोपी सध्या पोलीस कस्टडी रिमांड मध्ये असुन पुढील तपास यवत पोलीस स्टेशनचे पोलीस उपनिरीक्षक सलीम शेख हे करत आहेत.
