वेल्हे : वेल्हे तालुक्यातील रस्त्यांच्या दुरवस्थेबाबत महाराष्ट्र नवनिर्माण सेनेकडून जिल्हाध्यक्ष संतोष दसवडकर यांच्या मार्गदर्शनाखाली चेलाडी ते वेल्हे रस्त्यावर दापोडे येथे आंदोलन करण्यात आले. येथील रस्त्यावर मनसेने वृक्षारोपण केले व वेल्ह्यातील सार्वजनिक बांधकाम विभागाच्या कार्यालयाला टाळे ठोकले.
येत्या आठ दिवसांत तालुक्यात येणाऱ्या सर्व रस्त्यांची दुरूस्ती न झाल्यास महाराष्ट्र नवनिर्माण सेनेकडून चेलाडी फाटा येथे ‘रास्ता रोको’ करण्यात येणार असल्याचा इशारा मनसेकडून देण्यात आला. याबाबतचे निवेदन वेल्हे सार्वजनिक बांधकाम विभाग कार्यालयात देण्यास गेले असता, कार्यालय बंद होते.
वेल्हे तालुक्यात येणारे चेलाडी ते वेल्हे, खानापूर ते वेल्हे, कादवे ते वेल्हे, कुसगाव ते वेल्हे, या मार्गातील या सर्व मार्गांची दुरवस्था झाली असून, ठिकठिकाणी मोठमोठे खड्डे पडले आहेत. वाहतुकीवर याचा मोठा परिणाम झाल्याचे दिसून येते. अनेक ठिकाणी पावसाच्या पाण्यामुळे रस्ते वाहून गेले आहेत. तालुक्यामध्ये किल्ले राजगड, तोरणा, मढेघाट, गुंजवणी यासारखी पर्यटन स्थळे आहेत. त्यामुळे नियमित या रस्त्यावरून पर्यटकांची वर्दळ असते. परंतु रस्ते खराब झाल्यामुळे वाहतुकीवर मोठा परिणाम होत आहे.
याप्रश्नी महाराष्ट्र नवनिर्माण सेनेचे जिल्हाध्यक्ष संतोष दसवडकर यांच्या मार्गदर्शनाखाली दापोडे या ठिकाणी वृक्षारोपण करून आंदोलन करण्यात आले. तसेच खरीप रस्त्यावरील खड्डे बुजवण्याचे काम अतिशय निकृष्ट दर्जाचे सुरू होते. या ठिकाणी मनसेचे पदाधिकारी जाऊन हे काम बंद पाडले व दर्जेदार काम करण्याच्या सूचना दिल्या.
वेल्ह्यातील सार्वजनिक बांधकाम विभागाचे कार्यालय कायमच बंद असते. याठिकाणी एकही अधिकारी, कर्मचारी उपस्थित नसतात. त्यामुळे या कार्यालयास मनसेकडून टाळे ठोकण्यात आले. या वेळी जिल्हाध्यक्ष संतोष दसवडकर, तालुका अध्यक्ष दिगंबर चोरगे, अंकुश दसवडकर संदीप दिघे,,ज्ञानेश्वर भुरुक, दत्ता शेंडकर, विकास भिकुले, सुनील रेणुसे, विनायक लिम्हन, अमोल गायकवाड, चंद्रकांत चव्हाण, धनंजय रेणुसे, राजू झांजे, अमित दसवडकर, उपसरपंच दत्ता कदम आदींसह मनसे कार्यकर्ते उपस्थित होते.
