सागर जगदाळे
भिगवण : पुणे-सोलापूर महामार्गावरील डाळज नंबर १ च्या हद्दीत गुरुवारी (ता. २३) रोजी रात्री आठ वाजण्याच्या सुमारास भीषण अपघात झाला. सोलापूरच्या दिशेने जाणाऱ्या ट्रॅक्टर ट्रालीला एसटी बसने पाठीमागून धडक दिल्याने झालेल्या अपघातात ट्रॅक्टर चालकासह सेवा रस्त्याने जाणाऱ्या तरुण दुचाकीस्वाराचा जागीच मृत्यू झाला. या अपघातास बसचालक विनायक सोपान गायकवाड (वय ४५ वर्षे, रा. काझी करबस, ता. अक्कलकोट, जि. सोलापूर) याला कारणीभूत ठरवून, त्याच्यावर भिगवण पोलीस ठाण्यात गुन्हा दाखल करण्यात आला आहे.
या अपघाताबाबत मिळालेल्या माहितीनुसार, आरोपी बसचालक त्याच्या ताब्यातील एसटी बस (क्र. एम.एच १३/सी यु/८१२५) पुण्याकडून सोलापूरच्या दिशेने घेऊन जात होता. त्यावेळी पुणे सोलापूर रस्त्याने भिगवणकडून इंदापूरच्या दिशेने चाललेल्या ट्रॅक्टरला पाठीमागून धडक दिल्याने चालक आबा करे यांना गंभीर मार लागला. त्यातच त्यांचा मृत्यू झाला.
त्यानंतर एसटी बस ही पुणे ते सोलापूरकडे जाणाऱ्या रस्त्याने पुणे सेवा रस्त्यावर खाली येऊन पल्सर मोटारसायकलवरून (क्र. एम.एच. ४२ बी.एच. ९७९७) डाळजकडे निघालेले रवींद्र रावसाहेब जगताप यांना धडक दिली. त्यानंतर एसटी बस उलटली व त्याखाली ते चिरडले गेले. त्यामुळे त्यांचा जागीच मृत्यू झाला.
बसमधील प्रवासी जखमी झाले असून, त्यांना उपचारासाठी रूग्णालयात दाखल करण्यात आले आहे. याबाबत भिगवण पोलीस ठाण्यात निलेश रामदास कोळी (वय ३३, रा. डाळज. नं. १, ता. इंदापूर, जि. पुणे) यांनी फिर्याद दिली आहे. अपघाताचा तपास पोलीस उपनिरीक्षक जाधव करीत आहेत.
ॲम्बुलन्सने दिली ‘आपुलकीची सेवा’
दरम्यान, अपघातात जखमींची संख्या जास्त असल्याचा निरोप मिळाल्यानंतर ‘आपुलकीची सेवा’ ॲम्बुलन्सचे मालक केतन वाघ यांनी आपल्या मालकीच्या तिन्ही अॅम्बुलन्स घेऊन घटनास्थळी दाखल झाले. एसटी बसमधील जखमींना भिगवणमधील वेगवेगळ्या दवाखान्यांत दाखल केले. त्यामुळे त्यांना तत्काळ उपचार मिळण्यास मदत झाली. माणुसकी दाखवून वेळेला केलेल्या मदतीमुळे अपघातग्रस्तांच्या नातेवाईकांनी ॲम्बुलन्सचालक केतन वाघ यांचे आभार मानले.
