शिक्रापूर: शिक्रापूर पोलिसांनी नुकतीच एका चोरट्यांच्या टोळीला जेरबंद करण्यात यश मिळवले आहे. दुरुस्तीसाठी ग्राहकांनी दुकानात ठेवलेले १० महागडे इलेक्ट्रिक मोटार पंप चोरणाऱ्या तिघांना पोलिसांनी अटक केली आहे. जप्त करण्यात आलेल्या पंपांची एकूण किंमत १,००,००० रुपये इतकी आहे. चोरीच्या या घटनेने परिसरात काही काळ भीतीचे वातावरण निर्माण झाले होते, मात्र पोलिसांच्या जलद कारवाईमुळे गुन्हेगार गजाआड झाले आहेत.
रामदास आनंदराव सासवडे यांच्या दुकानाचे शटर उचकटून चोरट्यांनी हे पंप पळवले होते. या प्रकरणी सासवडे यांनी शिक्रापूर पोलीस ठाण्यात तक्रार दिली होती. पोलीस निरीक्षक चंद्रशेखर यादव यांनी या गुन्ह्याचा तपास करण्यासाठी विशेष पथक नेमले. तांत्रिक विश्लेषणाची मदत घेत पोलिसांनी आरोपींचे लोकेशन ट्रॅक केले. सणसवाडी येथील एल अँड टी फाटा परिसरात आरोपी लपून बसल्याची माहिती मिळताच पोलिसांनी सापळा रचला आणि अजय हनुमंत जाधव (वय 25), संतोष बालाजी लोहार (वय 24) आणि वैभव अशोक घुमरे (वय 21) या तिघांना ताब्यात घेतले.
तपासादरम्यान या तिघांनी संगनमताने चोरीचा कट रचल्याचे समोर आले आहे. अटक केलेल्या आरोपींना न्यायालयात हजर केले असता, त्यांना ४ दिवसांची पोलीस कोठडी सुनावण्यात आली आहे. या कामगिरीत पोलीस अधीक्षक डॉ. संदीपसिंह गिल्ल, अपर पोलीस अधीक्षक शुभम कुमार आणि उपविभागीय पोलीस अधिकारी अमोल मांडवे यांच्या मार्गदर्शनाखाली चंद्रशेखर यादव, सहायक पोलीस निरीक्षक भोसले, आर. डी. मळेकर, नितीन सुद्रीक, नागेश वाघमारे, विकास बांगर, संतोष बाबर, ललित चक्रनारायण आणि किरण बडे यांच्या पथकाने महत्त्वाची भूमिका बजावली. पुढील तपास पोलीस हवालदार आर. डी. मळेकर करत आहेत.
