पुणे: पुण्यातील ऐतिहासिक आणि पर्यटकांचे अत्यंत लाडके पर्यटन स्थळ असलेल्या सिंहगड किल्ल्यावर पावसाने थैमान घातले आहे. गडाच्या पायरी मार्गावर अचानक दरड कोसळल्याची घटना समोर आल्यामुळे परिसरात मोठी खळबळ उडाली आहे. सुदैवाने, या घटनेत कोणतीही जीवितहानी झाली नसून, पर्यटकांच्या सुरक्षिततेसाठी प्रशासनाने आता सतर्कतेचे आदेश जारी केले आहेत.
प्राप्त माहितीनुसार, ही घटना सिंहगड किल्ल्याच्या पहिल्या दरवाजाजवळ घडली आहे. सध्या पुणे शहर आणि जिल्ह्यातील घाटमाथ्यावर पावसाचा जोर ओसरण्याचे नाव घेत नाहीये. अतिवृष्टीमुळे डोंगराचा काही भाग कमकुवत होऊन पायरी मार्गावर माती आणि दगड-धोंड्यांचा ढिगारा साचला आहे. यामुळे पर्यटकांचा मार्ग काही काळासाठी बंद झाला होता. स्थानिक प्रशासन आणि वन विभागाच्या पथकाने तातडीने घटनास्थळी पोहोचून रस्ता मोकळा करण्याचे काम युद्धपातळीवर पूर्ण केले आहे.
सिंहगड परिसर सध्या दाट धुक्याने व्यापला असून, पावसाने पायऱ्या आणि चढणीचे रस्ते अत्यंत निसरडे बनले आहेत. अशा परिस्थितीत गड चढणे पर्यकांसाठी जीवघेणे ठरू शकते. त्यामुळे पुढील काही दिवस पर्यटकांनी सिंहगडची वारी टाळावी किंवा गडावर आल्यास अतिशय सावधानता बाळगावी, अशी विनंती प्रशासनाकडून करण्यात आली आहे.
