आदित्य बोराटे
इंदापूर: इंदापूर तालुक्यातील लासुर्णे येथील प्राथमिक आरोग्य केंद्राच्या जनआरोग्य समितीची बैठक गुरुवारी (दि.२) समितीच्या अध्यक्षा तथा जिल्हा परिषद सदस्या निर्मलाताई सागर मिसाळ यांच्या अध्यक्षतेखाली पार पडली. बैठकीत प्राथमिक आरोग्य केंद्रातील आरोग्य सेवांचा आढावा घेण्यात आला असून, शासकीय आरोग्य योजनांचा लाभ सर्वसामान्य, गोरगरीब व कष्टकरी नागरिकांपर्यंत प्रभावीपणे पोहोचविण्याचा निर्धार व्यक्त करण्यात आला.
बैठकीस पंचायत समितीचे सभापती हर्षवर्धन लोंढे, सदस्य श्रीराज भरणे, डॉ. अनिताताई सोनवणे यांची प्रमुख उपस्थिती होती. यावेळी जनआरोग्य समितीच्या सदस्यांनी आशा सेविका व कर्मचाऱ्यांशी संवाद साधत त्यांच्या कामकाजाची माहिती घेतली. तसेच प्राथमिक आरोग्य केंद्र परिसरात वृक्षारोपण करण्यात आले.
समितीच्या सदस्यांच्या हस्ते महापुरुषांच्या पुस्तकांचे वाटप करून उपस्थितांचे स्वागत व सत्कार करण्यात आला. प्राथमिक आरोग्य केंद्रातील डॉक्टर, कर्मचारी आणि आशा सेविकांच्या कार्याबद्दल समितीने समाधान व्यक्त केले.
तालुका वैद्यकीय अधिकारी डॉ. सुरेखा पोळ यांनी केंद्राच्या कामकाजाचा सविस्तर आढावा सादर केला. डॉ. पांढरे व डॉ. मारकड यांनी उपस्थितांचे स्वागत केले. बैठकीस प्राथमिक आरोग्य केंद्राचे अधिकारी, कर्मचारी, आशा सेविका तसेच जनप्रतिनिधी व जनआरोग्य समितीचे सदस्य उपस्थित होते.
