लोणीकंद : पुणे-नगर महामार्गावरील लोणीकंद (ता. हवेली) येथील बहुचर्चित ‘गोल्डन मॅन’ सचिन नानासाहेब शिंदे खून प्रकरणात आरोपी मनोज साळवे यांची न्यायालयाने निर्दोष मुक्तता केली आहे. बचाव पक्षाच्या वकिलांनी साळवे यांचा खुनाच्या गुन्ह्यात प्रत्यक्ष अथवा अप्रत्यक्ष सहभाग नसल्याचा युक्तिवाद केला. तसेच, त्यांच्याविरुद्ध ठोस पुरावा नसल्याचा मुद्दा न्यायालयासमोर मांडला. हा युक्तिवाद ग्राह्य धरून विशेष जिल्हा सत्र न्यायालयाने साळवे यांची या प्रकरणातून निर्दोष मुक्तता केली.
लोणीकंद येथील एचडीएफसी बँकेच्या एटीएमसमोर सचिन शिंदे यांच्यावर 9 फेब्रुवारी 2021 रोजी सकाळी 11.50 वाजण्याच्या सुमारास गोळीबार करून त्यांचा खून करण्यात आला होता. या घटनेमुळे परिसरात मोठी खळबळ उडाली होती. या प्रकरणी लोणीकंद पोलीस ठाण्यात गुन्हा दाखल करण्यात आला होता. तपासानंतर पोलिसांनी 12 ते 13 आरोपींविरुद्ध न्यायालयात दोषारोपपत्र दाखल केले होते. त्यामध्ये मनोज साळवे यांचाही समावेश होता.
बचाव पक्षाचा ठोस युक्तिवाद
या प्रकरणात मनोज साळवे यांच्या वतीने ॲड. विपुल दुशिंग आणि ॲड. सर्वेश निकम यांनी बाजू मांडली. साळवे यांचा सचिन शिंदे यांच्या खुनाशी कोणताही संबंध नसून, पोलिसांनी दाखल केलेल्या दोषारोपपत्रात त्यांच्याविरुद्ध ठोस पुरावा नसल्याचा युक्तिवाद बचाव पक्षाने केला. त्यांना या प्रकरणात चुकीच्या पद्धतीने गोवण्यात आल्याचा मुद्दाही न्यायालयासमोर मांडण्यात आला. फिर्यादी पक्षाच्या वतीने ॲड. उज्वला पवार यांनी काम पाहिले.
दरम्यान, बचाव पक्षाचा युक्तिवाद ग्राह्य धरून विशेष जिल्हा सत्र न्यायालयाचे न्यायाधीश एस. एस. कंठाळे यांनी मनोज साळवे यांची या खून प्रकरणातून निर्दोष मुक्तता केली. दरम्यान, या निकालामुळे सचिन शिंदे खून प्रकरण पुन्हा चर्चेत आले असून, या प्रकरणातील अन्य आरोपींबाबतच्या न्यायालयीन प्रक्रियेकडे लक्ष लागले आहे.
