पुणे: नवजात बालकांची अवैध खरेदी-विक्री करणाऱ्या एका टोळीचा पोलिसांनी पर्दाफाश केला असून, या प्रकरणात भाजपच्या २ महिला पदाधिकाऱ्यांना बेड्या ठोकण्यात आल्या आहेत. सायली येरणे आणि भाग्यश्री हांडे अशी अटक करण्यात आलेल्या महिलांची नावे आहेत. या दोन्ही महिला भाजपच्या स्थानिक पदाधिकाऱ्या असून, या कारवाईमुळे परिसरात मोठी खळबळ उडाली आहे. या महिला भाजपचे आमदार किशोर जोरगेवार यांच्या जवळच्या मानल्या जातात, त्यामुळे या प्रकरणात राजकीय वर्तुळातही जोरदार चर्चा सुरू आहे.
मे २०२६ मध्ये नागपुरात एका नवजात बालकाच्या विक्रीचा प्रयत्न झाला होता, तिथूनच या रॅकेटचे धागेदोरे पोलिसांच्या हाती लागले. या संपूर्ण गुन्ह्याचा मुख्य सूत्रधार अजय फुलझेले असल्याचे तपासात समोर आले आहे. पोलीस तपासात असे निष्पन्न झाले आहे की, सायली येरणे आणि भाग्यश्री हांडे यांनी या विक्रीत दलालाची भूमिका बजावली होती. बाळाची खरेदी-विक्री करताना आवश्यक असणारी कागदपत्रे तयार करणे आणि कायदेशीर प्रक्रियेत मदत करणे, असे काम या महिलांनी केले होते, असा पोलिसांचा आरोप आहे.
या गंभीर गुन्ह्याबाबत पोलिसांनी मानव तस्करी आणि ‘पॉक्सो’ (POCSO) कायद्याच्या अंतर्गत गुन्हे दाखल केले आहेत. यापूर्वीच पीडित मुलीची आई आणि हैदराबाद-चंद्रपूर येथील दोन महिला खरेदीदारांना पोलिसांनी अटक केली आहे. पोलीस अधीक्षक आयुष नोपाणी यांच्या मार्गदर्शनाखाली रामनगर पोलीस या प्रकरणाचा सखोल तपास करत आहेत.
