दिल्ली : राजधानी दिल्लीमध्ये ‘कॉक्रोच जनता पार्टी’ पुन्हा एकदा आक्रमक झाली आहे. सौरव दास आणि आशुतोष रांका यांच्या अटकेचा निषेध नोंदवण्यासाठी CJP चे संस्थापक अभिजीत दिपके यांनी आज सायंकाळी सेंट्रल पार्क येथे ‘तिरंगा मार्च’चे आयोजन केले होते. मात्र, या आंदोलनापूर्वीच दिल्ली पोलिसांनी दिपके यांना ताब्यात घेतले आहे.
सकाळी पोलिसांनी अभिजीत दिपके यांना घरी जाऊन आंदोलनाला परवानगी नसल्याची नोटीस बजावली होती. असे असूनही ते सेंट्रल पार्कच्या दिशेने निघाल्याने पोलिसांनी ही कारवाई केली. पोलिसांच्या या कारवाईवर दिपके यांनी “माझा गुन्हा काय?” असा सवाल उपस्थित केला. यावर आंदोलनाची परवानगी नसतानाही गर्दी जमा केली जात असल्याने ही कारवाई केल्याचे पोलिसांनी स्पष्ट केले.
या आंदोलनाला आम आदमी पार्टीसह AISA आणि SFI या डाव्या विचारसरणीच्या विद्यार्थी संघटनांनीही पाठिंबा दर्शवला आहे. आंदोलनाच्या पार्श्वभूमीवर कनॉट प्लेस परिसरात मोठा पोलीस बंदोबस्त तैनात करण्यात आला असून दिल्ली वाहतूक पोलिसांनी विशेष ट्रॅफिक ॲडव्हायझरी जारी केली आहे.
सध्या सेंट्रल पार्कमध्ये CJP चे अनेक कार्यकर्ते एकत्र आले असून केवळ 11 जणांनाच तिरंगा फडकवण्याची सवलत देण्यात आली आहे. मात्र, आंदोलनाचा मुख्य चेहरा असलेल्या अभिजीत दिपके यांना पोलिसांनी ताब्यात घेतल्यामुळे आणि इतर प्रमुख नेते अद्याप घटनास्थळी न पोहोचल्यामुळे या रॅलीचे नेतृत्व नक्की कोण करणार, असा मोठा प्रश्न निर्माण झाला आहे.
