Sushma Andhare : मुंबई : मराठा आरक्षणाच्या मागणीकरिता मनोज जरांगे पाटील पूर्ण प्रयत्नाने लढत आहेत, त्यांच्यावर वैयक्तिक तशीच सामाजिक रित्याही टीका होत आहे. आता त्या सुषमा अंधारे यांनी उडी घेतल्याच दिसत आहे. कालपर्यंत छगन भुजबळ जरांगे पाटलांच्या सभेला लागणाऱ्या पैशांबाबतीत बोलत होते. मात्र, आता सुषमा अंधारेंनी ही त्यांच्या पाटीलकी आणि होणाऱ्या मोठ्या सभांवर प्रश्नचिन्ह उभं केलं आहे.
आरक्षणाची कोंडी केंद्र सरकारच फोडू शकतं
मराठा आरक्षण मिळालं पाहिजे, ही आमचीही भूमिका आहे. पण ही भूमिका घेत असताना ओबीसी आरक्षणाला धक्का न लावता मिळालं पाहिजे, अशी आमची मागणी आहे. पण हा तिढा फक्त केंद्र सरकारच सोडवू शकतं किंबहुना मराठा आरक्षण मुद्द्याची कोंडी तिथेच फुटू शकते. मराठा आरक्षणासंबंधीचा विधिमंडळाने एक ठराव पास करून केंद्र सरकारकडे पाठवावा. आणि त्यानंतर केंद्र सरकारने विशेष अधिवेशन बोलावून मराठा आरक्षणाचा प्रश्न मार्गी लावावा, असं सुषमा अंधारे यांनी म्हटलं.
मागास म्हणायचं आणि १०० जेसीबीमधून फुलांची उधळण करायची
एकीकडे आम्ही मागास आहे असं सांगायचं आणि जरांगे आडनावाबरोबर पाटील लावायचं. आर्थिक मागास असल्याचं सांगायचं आणि त्याचवेळी १०० जेसीबीमधून फुलांची उधळण करायची. आमच्याकडे काहीच नाही बोलायचं आणि सभेसाठी १५० एकर मोसंबीची बाग तोडायची, हे कुठेतरी विरोधाभासी असल्याचं सांगत जरांगेच्या भूमिकांवर अंधारे यांनी प्रहार केलाय.
सुषमा अंधारेंनी म्हटलं आहे की, मनोज जरांगे मराठा आरक्षणाच्या मागणीकरिता पूर्ण प्रयत्नाने लढत होते सुरूवातीला वाटलं होतं. पण मागील काही दिवसांपासून त्यांची वक्तव्ये पाहिली तर त्यांचा आरक्षणावरून फोकस हललेला दिसून येतो आहे. अगदी छगन भुजबळ यांची लायकी काय? इथपर्यंतचा त्यांचा तोल घसरला आहे. जरांगे पाटलांना व्यक्तिगत टीका-टिप्पणी करणं शोभत नाही, अशा शब्दात शिवसेना ठाकरे गटाच्या उपनेत्या सुषमा अंधारे यांनी मनोज जरांगे यांना खडसावलं आहे. त्याचवेळी आर्थिक मागास असल्याचं बोलायचं आणि दुसरीकडे १०० जेसीबीने फुलांची उधळण करायची. आमच्याकडे काहीच नाही बोलायचं आणि सभेसाठी १५० एकर मोसंबीची बाग तोडायची, अशी टीकाही सुषमा अंधारे यांनी केलीये.
