लोणी काळभोर, ता. 11 : विवाहासाठी पाहुणे बघून गेल्याने एक अकरावीची विद्यार्थिनी घरातून पळून गेल्याची घटना घडली आहे. ही घटना लोणी काळभोर (ता. हवेली) ग्रामपंचायत हद्दीतील माळीमळा परिसरात घडली असून सोमवारी (ता.10) पहाटे पाच वाजण्याच्या सुमारास ही घटना उघडकीस आली. लोणी काळभोर पोलिसांनी घटनेचे गांभीर्य लक्षात घेऊन अवघ्या 24 तासाच्या आत मुलीचा शोध घेऊन तिला तिच्या पालकांच्याकडे सुखरूप सुपूर्त केले आहे. त्यामुळे लोणी काळभोर पोलिसांच्या या कामगिरीबद्दल सर्व नागरिकांकडून त्यांचे भरभरून कौतुक होत आहे.
पोलिसांनी दिलेल्या माहितीनुसार, अकरावीच्या वर्गात शिक्षण घेत असलेली 16 वर्षाची विद्यार्थिनी ही लोणी काळभोर येथील तिच्या चुलत्याकडे राहण्यासाठी आली होती. मुलीचे चुलते हे लोणी काळभोर परिसरातील एका शाळेच्या गाडीवर चालक म्हणून काम करतात. दरम्यान, चांगले स्थळ बघून मुलीचे लग्न जमवून ठेवावे. शिक्षण व 18 वर्ष पूर्ण झाल्यावर तिचा विवाह करायचा. असे मुलीच्या आईवडिलांनी ठरविले होते. रविवारी (ता.9) मुलीला पाहुणे बघून गेले होते. आपला विवाह होणार या भीतीने मुलगी त्याच रात्री घर सोडून गेली होती.
दरम्यान, मुलीला कोणीतरी अज्ञात इसमाने तिच्या अल्पवयाचा गैर फायदा घेवुन फुस लावून पळवून नेले आहे. अशी फिर्याद मुलीच्या आईवडिलांना लोणी काळभोर पोलीस ठाण्यात दिली होती. त्यानुसार लोणी काळभोर पोलीस ठाण्यात अज्ञात व्यक्तीच्या विरोधात भारतीय न्याय संहीता कलम 137(2) प्रमाणे अपहरणाचा गुन्हा दाखल करण्यात आला होता. सदर गुन्ह्याचे गांभीर्य लक्षात घेऊन लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांनी पोलीस उपनिरीक्षक सर्जेराव बोबडे व त्यांच्या सहकाऱ्यांचे एक पथक तयार केले होते.
सदर गुन्ह्याचा तपास करीत असताना, पोलिसांनी तांत्रिक विश्लेषण व खबऱ्यामार्फत माहिती मिळवली असता. मुलगी ही कदमवाकवस्ती (ता. हवेली) ग्रामपंचायत हद्दीतील लोणी स्टेशन परिसरात आहे. अशी माहिती मिळाली होती. मिळालेल्या माहितीच्या अनुषंगाने पोलिसांनी तत्काळ घटनास्थळी धाव घेऊन मुलीला मंगळवारी (ता.11) पहाटे पाच वाजण्याच्या सुमारास ताब्यात घेतले. आणि मुलीला सुखरूप पालकांच्या स्वाधीन केले.
ही कामगिरी लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे, पोलीस उपनिरीक्षक सर्जेराव बोबडे, पोलीस अंमलदार संदीप धुमाळ, उषा थोरात यांच्या पथकाने केली आहे. लोणी काळभोर पोलिसांनी कौशल्यपुर्वक तपास करून मुलीला अवघ्या 24 तासाच्या आत सुखरूप पालकांकडे सुपूर्त केले आहे. पोलिसांच्या या कामगिरीचे सर्वत्र कौतुक होत आहे.
