बारामती : रात्रीच्या वेळी वाटसरूंना अडवून मारहाण करून मोबाईल, रोख रक्कम जबरीने चोरून नेणाऱ्या सराईत टोळीला पोलिसांनी जेरबंद केले आहे. अरबाज उर्फ बबलू हैदर शेख (वय २४, रा. खंडोबानगर, बारामती), अविनाश उर्फ माऊली धनंजय लोंढे (वय १९, रा. मळद, भोंगळे वस्ती, बारामती), समाधान
दत्तात्रय खंडागळे (वय १९), रोहित विठ्ठल पवार (वय १९, दोघे रा. दादा पाटीलनगर, तांदुळवाडी, बारामती) अशी अटक केलेल्यांची नावे आहेत.
बारामती तालुका पोलीस ठाण्याच्या हद्दीतील एमआयडीसी, भिगवण रोड, सिटीइन चौक, बारामती क्लब या परिसरात जबरी चोरीच्या घटना घडल्या होत्या. गुन्हा उघडकीस आणण्यासाठी पोलिसांच्या तपास पथकांनी सीसीटीव्ही फुटेज तपासले. मात्र, त्यातून महत्त्वाचे धागेदोरे हाती आले नाहीत. गुन्ह्याचे गांभीर्य ओळखून पोलीस अधीक्षक पंकज देशमुख यांच्या आदेशावरून स्थानिक गुन्हे शाखेचे पोलीस निरीक्षक अविनाश शिळीमकर यांनी स्वतः लक्ष घालून दोन पथकांसह तपास करून एमआयडीसी, भिगवण रोड, सिटीइन चौक येथील गुन्ह्यातील अरबाज उर्फ बबलू शेख, अविनाश उर्फ माऊली लोंढे यांना अटक केली असून, सदर गुन्ह्यात निलेश गोरे (रा.खंडोबा नगर बारामती) याचाही सहभाग असून, तो फरार आहे.
बारामती क्लब येथील गुन्ह्यात समाधान खंडागळे, रोहित पवार यांना अटक केली आहे. या गुन्ह्यात आणखी एक आरोपी असल्याचे निष्पन्न झाले आहे. तालुका पोलीस ठाण्याच्या हद्दीत मागील १० दिवसांत वाटसरूंना रात्रीच्या वेळी अडवून मारहाण करत मोबाईल व रोख रक्कम चोरून नेल्याचे गुन्हे दाखल होते. याकामी गुन्हे स्थानिक गुन्हे शाखा व तालुका पोलीस ठाण्याच्या पथकाने उघडकीस आणले असून, आरोपींना अटक करण्यात यश आले आहे.
