Goa Night Club Fire: उत्तर गोव्यातील अर्पोरा येथील एका प्रसिद्ध नाईट क्लबमध्ये शनिवारी 6 डिसेंबरला रात्री उशिरा भीषण आग लागल्याची दुर्दैवी घटना घडली. प्राथमिक अंदाजानुसार, ही आग सिलिंडर स्फोटामुळे लागली आणि यामध्ये एकूण 23 जणांचा मृत्यू झाला आहे. अनेक लोक जखमी झाले असून त्यांना तातडीने उपचारासाठी रुग्णालयात दाखल करण्यात आले आहे.
मृतांमध्ये पर्यटक आणि स्थानिकांचा समावेश
या घटनेतील मृतांमध्ये तीन महिला आणि 20 पुरुषांचा समावेश आहे. स्थानिक भाजप आमदार मायकल लोबो यांनी माध्यमांना दिलेल्या माहितीनुसार, यातील मृतांपैकी काही पर्यटक होते, तर बहुतेक स्थानिक लोक रेस्टॉरंटच्या तळघरात काम करत होते. धुराचे लोट आणि मोठ्या ज्वाळांमुळे बचावकार्यात अडथळे आले, मात्र अग्निशमन दल आणि पोलिसांनी रात्रभर बचावकार्य करून अनेक लोकांना वेळेत बाहेर काढले.
मुख्यमंत्र्यांकडून कठोर कारवाईचे आदेश
घटनेची माहिती मिळताच गोव्याचे मुख्यमंत्री प्रमोद सावंत यांनी तातडीने घटनास्थळी धाव घेतली. त्यांनी या दुर्घटनेबद्दल तीव्र दुःख व्यक्त केले. “या घटनेत एकूण 23 जणांचा मृत्यू झाला आहे. ज्यांनी आपला जीव गमावला त्यांच्याबद्दल मी शोक व्यक्त करतो. गोवा सरकार या घटनेची सखोल चौकशी करेल आणि जबाबदार असलेल्यांना कठोर शिक्षा करेल,” असे मुख्यमंत्री प्रमोद सावंत यांनी स्पष्ट केले.
मुख्यमंत्र्यांनी दोषींवर कठोर कारवाई करण्याचे आणि जबाबदार असलेल्यांना अटक करण्याचे आदेश दिले आहेत. पर्यटन स्तरावर गोव्याच्या इतिहासातील ही एक अत्यंत महत्त्वाची आणि अस्वस्थ करणारी घटना असल्याचे त्यांनी म्हटले आहे.
या घटनेमुळे गोव्याच्या पर्यटन हंगामात एक मोठी दुःखद घटना घडली आहे, ज्याची सखोल चौकशी सरकार करणार आहे. असे राज्याच्या मुख्यमंत्र्यांनी सांगितले आहे.
