अहिल्यानगर: जामखेड येथील एका (Ahilyanagar Crime) कला केंद्रात काम करणाऱ्या दिपाली पाटील (Deepali Patil) यांच्या मृत्यू प्रकरणात नवी माहिती समोर आली आहे. दिपाली पाटील हिने जामखेडच्या खर्डा रोडवरील एका लॉजमध्ये गळफास घेऊन आत्महत्या केल्याची घटना उघडकीस आली असून या प्रकरणामुळे अहिल्यानगर जिल्ह्याच्या राजकारणात खळबळ उडाली आहे. या घटनेनंतर दिपालीची आई दुर्गाबाई गायकवाड यांनी जामखेड पोलीस ठाण्यात तक्रार दाखल केली आहे. (Pune News)
तक्रारीत माजी नगरसेवक संदीप गायकवाड याने दिपाली पाटील हिला मानसिक त्रास देत आत्महत्येस प्रवृत्त केल्याचा आरोप करण्यात आला आहे. तक्रारीची दखल घेत पोलिसांनी संदीप गायकवाड याच्यावर गुन्हा दाखल केला असून त्याला अटक करण्यात आली आहे. या कारवाईनंतर प्रकरणाला आणखी वेग आला आहे.
दरम्यान, संदीप गायकवाड हा विवाहित असून त्याच्या पत्नीने नुकत्याच झालेल्या नगर परिषदेच्या निवडणुकीत भाजपच्या तिकिटावर निवडणूक लढवली होती. त्यामुळे या प्रकरणाला राजकीय रंग चढला असून आमदार रोहित पवार यांनी या घटनेवर प्रतिक्रिया देताना भाजपवर टीका केली आहे. याला भाजपकडूनही उत्तर देण्यात आले आहे.
या प्रकरणात आज संदीप गायकवाड याला न्यायालयात हजर करण्यात आले. सुनावणीदरम्यान न्यायालयाने सरकारी वकिलांचा आणि बचाव पक्षाचा युक्तिवाद ऐकून घेतला. त्यानंतर न्यायालयाने संदीप गायकवाड याला 9 डिसेंबरपर्यंत पोलीस कोठडी सुनावली आहे. आता पोलिसांकडून या कालावधीत सखोल चौकशी केली जाणार असून आणखी महत्त्वाचे धागेदोरे समोर येण्याची शक्यता आहे.
