Loni Kalbhor : लोणी काळभोर, (पुणे) : पुणे-सोलापूर राष्ट्रीय महामार्गावर टँकर चालकांच्या मनमानी कारभारामुळे वाहतूक व्यवस्थेचे अक्षरशः तीनतेरा वाजले आहेत. लोणी काळभोर परिसरात एचपीसीएल (HPCL) कंपनीच्या टँकरांनी मुख्य महामार्ग आणि सेवा रस्ता (Service Road) आपल्या ताब्यात घेतल्याने शनिवारी (ता.16) सकाळपासूनच प्रवाशांना वाहतूक कोंडीत अडकून पडावे लागले. या परिस्थितीमुळे स्थानिक नागरिक आणि प्रवाशांचे प्रचंड हाल होत असून प्रशासनाविरोधात संतापाची लाट उसळली आहे. या ठिकाणी वारंवार होत असलेल्या या प्रकारांनंतरही ठोस उपाययोजना का होत नाहीत, असा प्रश्न उपस्थित होत आहे. Loni Kalbhor
नेहमीप्रमाणे लोणी काळभोर परिसरातील एचपीसीएल कंपनीकडे जाणाऱ्या टँकरनी नियमांची पायमल्ली करत रस्त्यावरच रांगा लावल्या. यामुळे मुख्य महामार्ग तर जाम झालाच, पण पर्यायी असलेला सेवा रस्ताही टँकरच्या गर्दीने फुलून गेल्याने दुचाकीस्वारांनाही मार्ग काढणे कठीण झाले. या अवजड वाहनांच्या अनधिकृत पार्किंगमुळे अपघाताचा धोकाही वाढला आहे. Loni Kalbhor
वाहतूक कोंडी सोडवण्याचे मुख्य काम बाजूला ठेवून पोलीस प्रशासन सामान्य नागरिकांच्या वाहनांची तपासणी आणि दंड वसुलीत व्यस्त असल्याचे चित्र पाहायला मिळाले. टँकर चालकांवर कठोर कारवाई करण्याऐवजी पोलीस दुचाकी आणि चारचाकी वाहनधारकांना लक्ष्य करत असल्याचा आरोप संतप्त नागरिकांनी केला आहे. “मोठ्या कंपन्यांच्या टँकरवर कारवाई करायला प्रशासनाचे हात का थरथरतात? नियम फक्त सामान्य माणसांसाठीच आहेत का?” असा रोकडा सवाल नागरिक विचारत आहेत. Loni Kalbhor
वारंवार होणाऱ्या या कोंडीमुळे कामावर जाणारे नोकरदार, विद्यार्थी आणि रुग्णवाहिकांचे मोठे नुकसान होत आहे. एचपीसीएल कंपनीने आपल्या वाहनांसाठी स्वतंत्र पार्किंगची व्यवस्था करावी आणि वाहतूक पोलिसांनी केवळ वसुली न करता कोंडी सोडवण्याला प्राधान्य द्यावे, अशी मागणी जोर धरत आहे. Loni Kalbhor
दरम्यान, लोणी काळभोर आणि हडपसर पोलिस या प्रकरणात काय कारवाई करणार, याकडे सर्वांचे लक्ष लागले आहे. नागरिकांनी तात्काळ कारवाई करून महामार्ग मोकळा करण्याची आणि टँकर चालकांवर कडक कारवाई करण्याची मागणी केली आहे. Loni Kalbhor
