पुणे : पुण्यातील विश्रांतवाडी परिसरातून दारूच्या व्यसनापोटी एका मुलाने आपल्याच आईचा खून केल्याचा प्रकार समोर आला आहे. दारू पिण्यासाठी पैसे न दिल्याने चिडलेल्या मुलाने पोटच्या आईवर चाकूने वार करून तिचा जीव घेतला. या घटनेमुळे संपूर्ण शहरात खळबळ उडाली आहे.
मिळालेल्या माहितीनुसार,आई सविता सुरेश हरिभक्त (वय 50) यांचा मृत्यू झाला आहे.शनिवारी रात्री आरोपी सागरने दारू पिण्यासाठी आईकडे पैशांची मागणी केली होती. मात्र, आईने पैसे देण्यास ठाम नकार दिला. यावरून दोघांमध्ये तीव्र भांडण झाले. वादाच्या वेळी रागाच्या भरात सागरने घरातील चाकूने आईच्या गळ्यावर वार केले. या हल्ल्यात प्रचंड रक्तस्त्राव झाल्यामुळे सविता यांचा जागीच मृत्यू झाला.
घरातून येणारे भांडणाचे आणि किंचाळण्याचे आवाज ऐकून शेजाऱ्यांनी तातडीने विश्रांतवाडी पोलिसांशी संपर्क साधला. वरिष्ठ पोलीस निरीक्षक राजेंद्र पानहळे यांच्या मार्गदर्शनाखाली पोलीस पथक तात्काळ घटनास्थळी पोहोचले. पोलिसांनी मृतदेह ताब्यात घेऊन पंचनामा केला, तसेच आरोपी सागरला जागेवरूनच ताब्यात घेऊन अटक केली.भारतीय न्याय संहिता (BNS) कलम 103(1) अन्वये त्याच्यावर हत्येचा गुन्हा दाखल करण्यात आला आहे.
व्यसनाच्या गर्तेत अडकलेली माणसे कौटुंबिक नात्यांची मर्यादा कशी ओलांडतात, हेच या दुर्देवी घटनेवरून पुन्हा एकदा उघड झाले आहे. पोलीस या प्रकरणाचा पुढील तपास करत आहेत.
