पुणे : गुजरात राज्यातील केवडिया (एकता नगर) येथे मंगळवार, 22 सप्टेंबर रोजी पार पडलेल्या 72व्या राष्ट्रीय चित्रपट पुरस्कार सोहळ्यात मराठी चित्रपटसृष्टीने दैदिप्यमान यश संपादन केले.परेश मोकाशी दिग्दर्शित ‘मुक्काम पोस्ट बोंबिलवाडी’ या चित्रपटाला सर्वोत्कृष्ट मराठी चित्रपटाचा बहुमान मिळाला.
या चित्रपटाचे निर्माते भरत शितोळे यांनी राष्ट्रपती द्रौपदी मुर्मू यांच्या हस्ते ‘रजत कमळ’ स्वीकारले. प्रशांत दामले, वैभव मांगले, आनंद इंगळे, अद्वैत दादरकर, प्रणव रावराणे, रितिका श्रोत्री, मनमीत पेम आणि गीतांजली कुलकर्णी यांसारख्या तगड्या कलाकारांचा अभिनय या सिनेमात पाहायला मिळतो.
देशाच्या राष्ट्रपती द्रौपदी मुर्मू यांच्या हस्ते 2024 या वर्षातील गुणवंत कलाकार व उत्कृष्ट सिनेमांचा गौरव करण्यात आला. नेहमी नवी दिल्लीत होणारा हा सोहळा यंदा प्रथमच दिल्लीबाहेर आयोजित करण्यात आला होता.तसेच ‘घरत गणपती’ या चित्रपटातील ‘नवसाची गौरी माझी’ या लोकप्रिय गाण्यासाठी अभय जोधपूरकर यांना सर्वोत्कृष्ट पुरुष पार्श्वगायकाचा राष्ट्रीय पुरस्कार प्रदान करण्यात आला. रोख रक्कम आणि ‘रजत कमळ’ देऊन त्यांना सन्मानित करण्यात आले.
इतर प्रमुख पुरस्कारांमध्ये ‘आर्टिकल 370’ने सर्वोत्तम फीचर फिल्मचा पुरस्कार जिंकला, तर याच चित्रपटासाठी यामी गौतमला सर्वोत्कृष्ट अभिनेत्री म्हणून गौरवण्यात आले. ‘चंदू चॅम्पियन’साठी कार्तिक आर्यन आणि ‘ब्रम्हयुगम’साठी ममूटी यांना संयुक्तपणे सर्वोत्कृष्ट अभिनेत्याचा पुरस्कार मिळाला. ‘अमरन’ चित्रपटाचे दिग्दर्शक राजकुमार पेरियासामी यांना सर्वोत्कृष्ट दिग्दर्शक पुरस्कार मिळाला.
‘भक्षक’साठी संजय मिश्रा यांना सहाय्यक अभिनेता, तर सचाना नमिदास (‘महाराजा’) व रोपाश्री वरकाडी (‘मिथ्या’) यांना संयुक्तपणे सर्वोत्कृष्ट सहाय्यक अभिनेत्रीचा पुरस्कार मिळाला. रणदीप हुड्डा यांना ‘स्वातंत्र्य वीर सावरकर’साठी पदार्पणातील उत्कृष्ट दिग्दर्शनाचा पुरस्कार मिळाला, तर ‘कल्कि 2898 एडी’ हा सर्वोत्तम मनोरंजक चित्रपट ठरला. याशिवाय ज्येष्ठ अभिनेते अनंत नाग यांना 2024 चा प्रतिष्ठित दादासाहेब फाळके पुरस्कार प्रदान करण्यात आला.या राष्ट्रीय मंचावर मराठी चित्रपटांचा विशेष प्रभाव पाहायला मिळाला.
