पुणे : मुख्य गणेश विसर्जन मिरवणुकीत लक्ष्मी रस्त्यावर सहभागी होणाऱ्या मध्यवर्ती भागातील १६ गणेश मंडळांना यंदा केवळ लिंबराज महाराज चौकातूनच प्रवेश दिला जाणार आहे. गणपती चौक, कुंटे चौक आणि उंबऱ्या गणपती चौकातून होणारा अनियोजित प्रवेश रोखण्यासाठी या ठिकाणी अवरोधक उभारण्यात येणार आहेत.
विविध चौकांतून मंडळे मिरवणुकीत मध्येच सहभागी झाल्यामुळे होणारा खोळंबा आणि मुख्य मिरवणुकीचा विस्कळीत होणारा क्रम टाळण्यासाठी पोलिसांनी हा निर्णय घेतला आहे. परिमंडळ एकचे पोलिस उपायुक्त कृषिकेश रावले यांनी संबंधित गणेश मंडळांच्या पदाधिकाऱ्यांसोबत बैठक घेऊन १६ मंडळांसाठी लिंबराज महाराज चौक हा एकमेव प्रवेशमार्ग निश्चित केला.
मुख्य विसर्जन मिरवणुकीचे लक्ष्मी रस्ता, कुमठेकर रस्ता, केळकर रस्ता आणि टिळक रस्ता हे प्रमुख मार्ग आहेत. मानाच्या गणपतींची मिरवणूक महात्मा फुले मंडईजवळील टिळक पुतळ्यापासून सुरू होऊन बेलबाग चौकातून लक्ष्मी रस्त्यावर दाखल होते. त्यानंतर लक्ष्मी रस्त्यावरील इतर मंडळे मिरवणुकीत सहभागी होतात.
गेल्या काही वर्षांपासून मध्यवर्ती भागातील काही मंडळे गणपती चौक, लिंबराज महाराज चौक, कुंटे चौक आणि उंबऱ्या गणपती चौकातून लक्ष्मी रस्त्यावर दाखल होत होती. त्यामुळे वेगवेगळ्या ठिकाणी मंडळे मिरवणुकीत सहभागी झाल्याने मुख्य मिरवणुकीचा सलग प्रवाह खंडित होत होता. परिणामी बेलबाग चौकातून आलेल्या मंडळांना बराच वेळ थांबावे लागत होते.
या पार्श्वभूमीवर १६ मंडळांसाठी लिंबराज महाराज चौक हा एकमेव प्रवेशमार्ग निश्चित करण्यात आला आहे. लक्ष्मी रस्त्यावर उपलब्ध होणाऱ्या जागेनुसार या मंडळांना पुढे सोडले जाणार आहे. मंडळांचा क्रम, प्रवेशाची वेळ आणि उपलब्ध जागा यांचा विचार करून टप्प्याटप्प्याने मंडळांना पुढे सोडण्याचे नियोजन करण्यात आले आहे.
यापूर्वी तात्पुरती परवानगी मिळालेल्या काही मंडळांना यंदा मुख्य मिरवणुकीत प्रवेश न देण्याची भूमिका पोलिसांनी घेतली होती. मात्र, संबंधित १६ मंडळांसाठी नियोजित प्रवेशमार्ग उपलब्ध करून देण्यात आला आहे. गणपती चौक, कुंटे चौक आणि उंबऱ्या गणपती चौकातून लक्ष्मी रस्त्यावर अनियोजित प्रवेश होऊ नये, यासाठी अवरोधक उभारण्यात येणार असल्याचे पोलिस उपायुक्त कृषिकेश रावले यांनी सांगितले.
