पुणे: भारत आणि पाकिस्तान यांच्यातील व्यापारावर कडक निर्बंध असतानाही पिंपरी-चिंचवडमध्ये पाकिस्तानी बनावटीचे ब्यूटी प्रॉडक्ट्स विकले जात असल्याचा प्रकार समोर आला आहे. पिंपरीतील एका दुकानात पाकिस्तानी कॉस्मेटिकची विक्री केल्याप्रकरणी दहशतवाद विरोधी शाखेने (ATS) कारवाई केली आहे.
पिंपरीतील पीएमपीएमएल बस स्टॉपजवळ असलेल्या ‘शक्ती कॉस्मेटिक्स’ या दुकानावर ATSच्या पथकाने छापा टाकला. या दुकानात ‘Goree Beauty Cream’ म्हणजेच ‘गोरी ब्यूटी क्रीम’ विक्रीसाठी ठेवण्यात आली होती. या क्रीमच्या पॅकिंगवर ‘Made in Pakistan’ अशी स्पष्ट नोंद असल्याचे समोर आले आहे.
भारतामध्ये विक्रीसाठी कायदेशीर परवानगी नसलेल्या या कॉस्मेटिकची विक्री केली जात असल्याच्या माहितीवरून ATSने दुकानात कारवाई केली. या कारवाईत ‘गोरी ब्यूटी क्रीम’च्या 23 क्रीम जप्त करण्यात आल्या आहेत. या प्रकरणी दुकानदाराविरोधात गुन्हा दाखल करण्यात आला आहे.
पाकिस्तानमधून तयार करण्यात आलेल्या उत्पादनांची भारतात विक्री करण्यासंदर्भातील निर्बंध असतानाही हे उत्पादन दुकानात कसे आले आणि त्याची विक्री कशी केली जात होती, याबाबत पुढील तपास केला जात आहे.
