उरुळी कांचन, दि. 13 : पूर्व हवेलीसाठी वरदान ठरलेला मुळा मुठा कालवा शेतकऱ्यांच्या बांधाच्या शेजारून दुथडी भरून वाहतोय. मात्र विजेअभावी शेतात उरली सुरली पिके सुकून जाण्याच्या मार्गावर आहेत. निसर्गाच्या लहरीपणामुळे आधीच दुष्काळाच्या दुष्टचक्रात अडकलेल्या शेतकऱ्यांसमोर आता विजेचे संकट उभे ठाकले आहे.
यंदा सरासरीपेक्षा अत्यंत कमी पाऊस पडल्याने ऊसापासून ते इतर नगदी पिके करपून चालली आहेत. शेतकऱ्यांच्या हातातोंडाशी आलेला घास हिरावला जात असताना परिसरात वारंवार वीज पुरवठा खंडित होत असल्याने पूर्व हवेलीतील उरुळी कांचन, सोरतापवाडी, शिंदवणे, व परिसरातील शेतकरी हैराण झाले आहेत.
विजेअभावी शेतातील पिकांना पाणी देता येत नसल्याने ऐन हिवाळ्यात कडक उन्हामुळे शेतातील पिके सुकू लागली आहे. त्यामुळे नर्सरी उद्योगासह शेतीचे अतोनात नुकसान या खंडीत प्रवाहाने होत असून व्यावसायिक ग्राहकाचे मोठे नुकसान अटळ असून योग्य दाबाने सुरळीत वीज पुरवठा करावा, अशी मागणी शेतकरी करू लागले आहेत. दोन आठवड्यांपासून 35 वर पोहोचलेला पारा, उन्हाच्या दाहकतेने भेगाळणाऱ्या जमिनी, महावितरणचा आठ तास वीजपुरवठा मात्र त्यातही वारंवार लोडशेडिंग यामुळे पुरेशी जमीन भिजत नसल्याने करपत चाललेली पिके ही भयाण वास्तवता सध्या शिवारात आहे.
दरम्यान, वाढत्या उन्हासह महावितरणच्या दुजाभावामुळे कालवा व नदीकाठच्या गावांतील पिके, जनावरे व शेतकरी होरपळून निघत आहेत. शेतीपंपांचा वीजपुरवठा वारंवार खंडित होत असून, पंप नादुरुस्त होत आहेत. वीज वितरण कंपनी मात्र खंडित वीजपुरवठ्याबाबत मौन बाळगून आहे. त्यामुळे ग्रामस्थ व शेतकरी वैतागले असून विजेच्या लपंडावामुळे मोठ्या प्रमाणात आर्थिक भुर्दंड सहन करावा लागत आहे.
दरम्यान, उन्हाच्या झळा सोसाव्या लागत असल्यामुळे पिके करपू लागली आहेत. भारनियमन, दुरुस्तीच्या कामामुळे वीजप्रवाह वारंवार खंडित होण्याचे प्रमाण आणि बाकी इतर कारणांमुळे कायमच वीजपुरवठा बंद असतो. त्यामुळे भारनियमनाच्या संकटाबरोबर इतर दुरुस्तीच्या संकटांशी शेतकऱ्यांना सामोरे जावे लागते. यात शेतकऱ्याचे मोठे नुकसान होत असून, वीज वितरण कंपनीच्या अधिकाऱ्यांनी तातडीने लक्ष घालून वीजप्रवाह सुरळीत करावा, अशी मागणी परिसरातील शेतकरी करू लागले आहेत.
पाणी मुबलक प्रमाणात असून सुद्धा लाईटच्या सतत लपंडावामुळे फलबागा भाजीपाला, ऊस पिके जळण्याच्या मार्गावर आहेत. दिवसा लाईट अजिबात राहत नाही. महावितरण कंपनीने विजेचा प्रश्न तात्काळ सोडवावा.
-सचिन विठ्ठल महाडिक, शेतकरी, शिंदवणे, (ता. हवेली)“परिसरातील लोड तोडण्यासाठी काम सुरु आहे. शिंदवणे फिडरसाठी नवीन सब स्टेशनच्या जागेसाठी पाठपुरावा सुरु आहे. नवीन फिडरचे काम सुरु झाल्यानंतर वीजपुरवठा सुरळीत होणार आहे. महिनाभरात फीडरचे काम सुरु होणार असून वीजपुरवठा चांगला होईल. क्यापेसीटर नवीन फिडर टाकणे याची कामे सध्या सुरु आहेत. त्यामुळे पुढील काळात लाईटच्या समस्या जास्त उद्भवणार नाहीत.
-महेश धाडवे, उपकार्यकारी अभियंता, महावितरण, उरुळी कांचन (ता. हवेली)
