लोणी काळभोर : मुसळधार पावसामुळे चहा घेण्यासाठी कवडीपाट टोलनाका (ता. हवेली) येथील हॉटेलमध्ये थांबलेल्या एका कंपनी मॅनेजरची खुर्चीजवळ ठेवलेली बॅग अज्ञात चोरट्याने लंपास केल्याची घटना मंगळवारी (ता. 22) सायंकाळी सहाच्या सुमारास घडली. बॅगेत लॅपटॉप आणि मोबाईलसह सुमारे 23 हजार 400 रुपयांचा मुद्देमाल होता.
याप्रकरणी हनुमंत गोरख झगडे (वय 42, रा. समर्थसृष्टी, भापकर प्लॉटिंग, कवडीपाट, लोणी काळभोर) यांनी लोणी काळभोर पोलिस ठाण्यात फिर्याद दिली आहे. त्यानुसार अज्ञात चोरट्याच्या विरोधात गुन्हा दाखल करण्यात आला आहे. पोलिसांनी दिलेल्या माहितीनुसार,झगडे हे हडपसर येथील एका कंपनीत व्यवस्थापक म्हणून कार्यरत असून, महाराष्ट्र व गोवा राज्यातील विक्रीचे काम पाहतात.
मंगळवारी कार्यालयाचे काम आटोपून घरी जात असताना मुसळधार पाऊस सुरू असल्याने ते कवडीपाट टोलनाका येथील एका हॉटेलमध्ये चहा घेण्यासाठी थांबले.झगडे यांनी ग्रे रंगाची बॅग खुर्चीजवळ ठेवली होती. त्यानंतर हॉटेलच्या किचनमध्ये पाहण्यासाठी ते काही वेळ गेले. परत येऊन पाहिले असता खुर्चीजवळ ठेवलेली बॅग गायब असल्याचे त्यांच्या निदर्शनास आले. त्यांनी हॉटेल चालकाच्या मदतीने परिसरात बॅगचा शोध घेतला; मात्र ती मिळून आली नाही.
चोरीस गेलेल्या मुद्देमालामध्ये 15 हजार रुपये किमतीचा एचपी कंपनीचा लॅपटॉप, 8 हजार 400 रुपये किमतीचा सॅमसंग मोबाईल आणि ग्रे रंगाची सफारी कंपनीची वापरती बॅग यांचा समावेश आहे. मोबाईलमध्ये एअरटेल कंपनीचे सिमकार्ड होते. कोणीतरी अज्ञात व्यक्तीने बॅग चोरून नेल्याचा संशय व्यक्त करत झगडे यांनी लोणी काळभोर पोलिसांकडे तक्रार दाखल केली आहे. या प्रकरणाचा पुढील तपास लोणी काळभोर पोलिस करीत आहेत.
