पिंपरी : गेल्या 15 वर्षांपासून रखडलेल्या पवना बंदिस्त जलवाहिनी प्रकल्पाच्या कामाला आता गती मिळण्याची शक्यता निर्माण झाली आहे. पिंपरी-चिंचवड महापालिकेच्या स्थायी समितीने या प्रकल्पासाठी अर्थसंकल्पात आणखी 121 कोटी 15 लाख रुपयांची तरतूद वाढवण्यास मंजुरी दिली आहे. त्यामुळे प्रकल्पाच्या निविदा काढण्याचा मार्ग मोकळा झाला आहे.
सुरुवातीला सुमारे 400 कोटी रुपये खर्च अपेक्षित असलेला हा प्रकल्प आता मोठ्या खर्चाच्या टप्प्यावर पोहोचला आहे. सुधारित आराखड्यानुसार 1,500 कोटी रुपयांच्या खर्चाला यापूर्वीच मान्यता देण्यात आली आहे. प्रकल्पासाठी केंद्र सरकारच्या अर्बन चॅलेंज फंडातूनही निधी मिळवण्याचे नियोजन आहे. निधीची तरतूद कमी असल्याने निविदा प्रक्रिया रखडली होती. आता वाढीव निधीला मंजुरी मिळाल्याने पुढील प्रक्रिया सुरू करता येणार आहे.
हा प्रकल्प एकाच ठेकेदाराकडे न देता 3 टप्प्यांत पूर्ण करण्याचे नियोजन करण्यात आले आहे. प्रत्येक टप्प्यासाठी स्वतंत्र निविदा काढून वेगवेगळ्या ठेकेदारांची नियुक्ती केली जाणार आहे. यामुळे काम कमी कालावधीत पूर्ण करण्याचा महापालिकेचा प्रयत्न आहे.
या योजनेअंतर्गत मावळ तालुक्यातील पवना धरणापासून निगडीतील सेक्टर क्रमांक 23 येथील जलशुद्धीकरण केंद्रापर्यंत 34.71 किलोमीटर लांबीची आणि 1,800 मिलिमीटर व्यासाची भूमिगत जलवाहिनी टाकली जाणार आहे. यापैकी शहराच्या हद्दीत 4.40 किलोमीटरचे काम पूर्ण झाले आहे. उर्वरित 30.31 किलोमीटर जलवाहिनी टाकणे बाकी आहे.
पवना धरणाजवळ पाणी उपसा केंद्र, जॅकवेल, पंपिंग स्टेशन आणि ब्रेक प्रेशर टाकी उभारली जाणार आहे. प्रकल्पासाठी शेतकऱ्यांना विश्वासात घेऊन पुढील काम केले जाईल, असे स्थायी समितीचे अध्यक्ष अभिषेक बारणे यांनी सांगितले. मुख्यमंत्री देवेंद्र फडणवीस यांच्या अंतिम तोडग्यानंतर प्रत्यक्ष कामाला सुरुवात होणार असल्याचेही त्यांनी स्पष्ट केले.
