पुणे: दिवाळीच्या सुट्ट्यांमुळे एसटी बसने प्रवास करणाऱ्या नागरिकांची संख्या वाढली आहे. त्यामुळे पुण्यातील नवीन शिवाजीनगर बसस्थानकावर तिकीट आरक्षणासाठी प्रवाशांची गर्दी होत आहे. मात्र, आरक्षण केंद्रावर डिजिटल पेमेंटची सुविधा उपलब्ध नसल्याने अनेक प्रवाशांना मनस्ताप सहन करावा लागत आहे. ऑनलाइन व्यवहारांची सवय असलेल्या नागरिकांना तिकीट काढण्यासाठी रोख रक्कम घेऊनच यावे लागत आहे.
सध्याच्या काळात बहुतांश ठिकाणी यूपीआय, डेबिट किंवा क्रेडिट कार्ड तसेच इतर ऑनलाइन माध्यमांतून पैसे भरण्याची सुविधा उपलब्ध आहे. मात्र, शिवाजीनगर बसस्थानकातील आरक्षण केंद्रावर केवळ रोख पैसे स्वीकारले जात असल्याची तक्रार प्रवाशांकडून केली जात आहे. त्यामुळे डिजिटल पद्धतीने पैसे देण्याची तयारी असलेल्या नागरिकांची अडचण होत आहे.
आरक्षण केंद्रात ऑनलाइन पेमेंट स्वीकारले जात नसताना बसस्थानक परिसरातील स्टेट बँक ऑफ इंडियाचे एटीएमही बंद असल्याची माहिती समोर आली आहे. परिणामी, ज्यांच्याकडे पुरेशी रोकड नाही, अशा प्रवाशांना पैसे काढण्यासाठी इतर ठिकाणी जावे लागत आहे. दिवाळीच्या गर्दीत या अतिरिक्त धावपळीमुळे प्रवाशांचा वेळही वाया जात आहे.
विशेष म्हणजे, एसटी महामंडळाकडून डिजिटल व्यवहारांना प्रोत्साहन दिले जात असताना प्रत्यक्ष आरक्षण केंद्रावर मात्र रोख रकमेचा आग्रह धरला जात असल्याने प्रवाशांनी नाराजी व्यक्त केली आहे.
सणासुदीच्या काळात बसस्थानकावर प्रवाशांची संख्या मोठ्या प्रमाणात वाढते. अशा वेळी आरक्षण केंद्रावर यूपीआय, कार्ड आणि इतर ऑनलाइन पेमेंटचे पर्याय उपलब्ध असणे गरजेचे आहे. त्यामुळे प्रवाशांची गैरसोय टाळण्यासाठी एसटी प्रशासनाने डिजिटल व्यवहारांची सुविधा तातडीने सुरू करावी, अशी मागणी होत आहे.
