पुणे: विमाननगर परिसरातील एका कॉस्मेटिक ज्वेलरीच्या दुकानात बेकायदा पदार्थांची विक्री सुरू असल्याचा प्रकार पोलिसांच्या कारवाईत उघड झाला आहे. बाहेरून दागिन्यांचे दुकान दिसणाऱ्या या ठिकाणी ई-सिगारेट, हुक्का फ्लेवर आणि गांजाची विक्री केली जात असल्याची माहिती समोर आली. या प्रकरणी विमानतळ पोलिसांनी 22 वर्षीय तरुणीला अटक केली आहे. अभिलाषा पंकज अहिरराव (रा. विमाननगर) असे अटक करण्यात आलेल्या तरुणीचे नाव आहे.
पोलिसांनी मंगळवारी विमाननगरमधील ‘क्लाउड कार्टेल’ या दुकानावर छापा टाकला. या कारवाईत ई-सिगारेट, प्रतिबंधित हुक्का फ्लेवर, 130 ग्रॅम गांजा आणि इतर साहित्य जप्त करण्यात आले. जप्त केलेल्या वस्तूंची एकूण किंमत 2 लाख 17 हजार 100 रुपये असल्याचे पोलिसांनी सांगितले.
विमानतळ पोलीस ठाण्याच्या हद्दीत ई-सिगारेट आणि हुक्का फ्लेवरची अवैध विक्री होत असल्याची माहिती पोलीस अंमलदार हरीप्रसाद पुंडे आणि लालू करहे यांना मिळाली होती. त्यानंतर पोलिसांनी दुकान क्रमांक 9 मध्ये तपासणी केली. दुकानात तसेच बाहेर उभ्या असलेल्या मोटारसायकलच्या डिक्कीतही प्रतिबंधित वस्तू आढळल्या. पोलिसांनी सर्व साहित्य ताब्यात घेतले.
या व्यवसायासाठी विमाननगर परिसरातील आयटी कंपन्यांमधील कर्मचारी, महाविद्यालयीन विद्यार्थी आणि तरुण ग्राहकांना लक्ष्य केले जात असल्याची माहिती पोलिसांनी दिली आहे.
तपासादरम्यान आरोपी तरुणी यापूर्वी डेक्कन परिसरात दुकान चालवत असल्याचे समोर आले. ते दुकान बंद केल्यानंतर तिने विमाननगरमध्ये कॉस्मेटिक ज्वेलरीचा व्यवसाय सुरू केला होता. मात्र, या दुकानाच्या आडून प्रतिबंधित पदार्थांची विक्री सुरू असल्याचा संशय पोलिसांच्या कारवाईत उघड झाला.या प्रकरणी विमानतळ पोलीस ठाण्यात गुन्हा दाखल करण्यात आला असून पुढील तपास सुरू आहे.
