पुणे : पुणे ग्रामीण पोलिसांची कार्यक्षमता पुन्हा एकदा चर्चेत आली आहे. बारामती तालुक्यातील गोजुबावी येथे व्यावसायिक राणा सूर्यवंशी यांच्यावर झालेल्या प्राणघातक हल्ल्याला 15 दिवस झाले, तरी पोलिसांना अद्याप मुख्य सूत्रधारांपर्यंत पोहोचता आलेले नाही. या प्रकरणात आतापर्यंत 4 जणांना अटक झाली असून एका अल्पवयीनाला ताब्यात घेतले आहे. मात्र, तपासात अद्यापही हल्ल्यामागील नेमके कारण समोर आलेले नाही.
18 तारखेला घडलेल्या या घटनेत सुरुवातीला गोळीबार झाल्याची चर्चा होती, परंतु धारदार शस्त्राने वार केल्याचे तपासात स्पष्ट झाले. या हल्ल्यानंतर राणा यांच्यासोबत असलेले 3 निकटवर्तीय अचानक फरार झाल्यामुळे संशय बळावला आहे. सीसीटीव्ही फुटेजमधील हालचालींवरून पोलिसांचा त्यांच्यावरील संशय आणखी वाढला असून, त्यांचा शोध घेण्यासाठी पोलीस विविध ठिकाणी छापेमारी करत आहेत. बारामती पोलिस ठाण्याचे वरिष्ठ निरीक्षक नारायण पवार यांनी, हे तिघे हाती लागल्यानंतरच संपूर्ण प्रकरणाचा खरा उलगडा होईल, असे स्पष्ट केले आहे.
या संपूर्ण प्रकरणाने राणा यांना मिळालेल्या वाय-प्लस सुरक्षेचा मुद्दाही ऐरणीवर आणला आहे. एका खासगी व्यावसायिकासाठी 3 ते 4 जिल्ह्यांतील पोलीस कर्मचारी तैनात असल्याचे समोर आल्यानंतरही आश्चर्य व्यक्त होत आहे. दुसरीकडे, सर्वसामान्य नागरिकांच्या सुरक्षेसाठी पोलीस ठाण्यांमध्ये कर्मचारी अपुरे पडत आहेत. या प्रकाराची गंभीर दखल घेत पोलीस महासंचालक सदानंद दाते यांनी वरिष्ठ अधिकाऱ्यांची बैठक घेऊन जाब विचारला असून काहींना नोटिसा बजावल्या आहेत. या प्रकरणाच्या चौकशीची सूत्रे आता अपर पोलीस महासंचालक निखिल गुप्ता यांच्याकडे सोपवण्यात आली आहेत.
राणा यांचे काही राजकीय नेत्यांशी असलेल्या जवळीकीमुळे पोलिसांमधील काही अधिकाऱ्यांनी नियमबाह्य मदत केल्याचे आरोपही होत आहेत. त्यांची वाय-प्लस सुरक्षा आता काढून घेतली असली, तरी या सुरक्षेसाठी इतके पोलीस बल वापरल्याबद्दल जबाबदारी कोणाची, हा प्रश्न कायम आहे. आता 15 दिवसांनंतरही तीन जण फरार असल्याने पोलिसांच्या तपासावर प्रश्नचिन्ह उपस्थित होत आहे. हल्ल्यामागचा खरा उद्देश आणि पडद्यामागील सूत्रधार कधी समोर येणार, याकडे सर्वांचे लक्ष लागले आहे.
