आझमगढ : उत्तर प्रदेशातील आझमगढ येथे धार्मिक विधी सुरू असताना गोळीबाराची धक्कादायक घटना घडली. अरविंद नावाच्या व्यक्तीने पत्नी, मुलगा आणि दोन पुजाऱ्यांवर गोळीबार केल्याचा आरोप आहे. या घटनेनंतर त्याने स्वतःला तीन मुलांसह एका खोलीत कोंडून घेतले. जवळपास सात तास ही तणावपूर्ण परिस्थिती कायम होती. अखेर अरविंदने पोलिसांवर गोळीबार केल्यानंतर पोलिसांनी प्रत्युत्तरादाखल केलेल्या गोळीबारात तो जखमी झाला आणि त्याचा मृत्यू झाला.
अधिकाऱ्यांच्या माहितीनुसार, धार्मिक विधीदरम्यान झालेल्या गोळीबारात अरविंदची पत्नी आणि दोन पुजाऱ्यांचा मृत्यू झाला. त्यानंतर त्याने स्वतःची दोन मुले आणि मेहुणीच्या मुलाला एका खोलीत कोंडून घेतले. पोलिस घटनास्थळी पोहोचल्यानंतर त्यांनी अरविंदला शरणागती पत्करण्यास आणि मुलांना सुरक्षितपणे बाहेर सोडण्यास सांगितले. त्याला समजावण्यासाठी त्याच्या कुटुंबीयांचीही मदत घेण्यात आली.
आझमगढचे एसएसपी डॉ. अनिल कुमार यांच्या माहितीनुसार, अरविंदने पोलिस कर्मचारी आणि कुटुंबीयांना गोळीबाराची तसेच मुलांना जीवे मारण्याची धमकी दिली. याच दरम्यान त्याने स्वतःच्या मुलावर गोळी झाडल्याचा आवाज पोलिसांना आला. त्यामुळे मुलांच्या सुरक्षेला प्राधान्य देत पोलिसांनी घरात प्रवेश करण्याचा निर्णय घेतला.
वाराणसी झोनचे एडीजी नवीन अरोरा यांनी सांगितले की, पोलिसांनी सुरुवातीला संयमाने परिस्थिती हाताळण्याचा प्रयत्न केला. अरविंद बाहेर येण्यास तयार नव्हता आणि सकाळपर्यंत पोलिसांनी वाट पाहावी, अशी मागणी करत होता. मात्र, सुमारे सात तास वेढा घातल्यानंतरही त्याने शरणागती पत्करली नाही.
दरम्यान, अरविंदने घरातून पोलिसांवर गोळीबार केल्यानंतर एसएसपी आणि एसओजी पथकातील काही कर्मचाऱ्यांनी दरवाजा तोडून घरात प्रवेश केला. पोलिसांनी स्टन ग्रेनेड आणि अश्रूधुराचा वापर केला. त्यानंतर अरविंदने पोलिसांवर गोळीबार केल्याने पोलिसांनी प्रत्युत्तरादाखल गोळीबार केला. यात अरविंद जखमी झाला आणि नंतर त्याचा मृत्यू झाला.
पोलिसांनी तिन्ही मुलांना बाहेर काढून रुग्णालयात दाखल केले. त्यापैकी गोळी लागलेल्या अरविंदच्या मुलाचा उपचारादरम्यान मृत्यू झाला, तर दोन मुलींवर उपचार करण्यात आले.
स्थानिक रहिवाशाच्या माहितीनुसार, धार्मिक विधीसाठी पाच पुजारी घरात आले होते. अरविंदने पूजा कशासाठी केली जात आहे, असा प्रश्न विचारल्यानंतर वाद सुरू झाला. त्यानंतर त्याने पत्नी आणि दोन पुजाऱ्यांवर गोळीबार केल्याचा आरोप आहे. इतर तीन पुजारी तेथून पळून जाण्यात यशस्वी झाले.
