पुणे: खडकवासला धरण साखळीतील पाणीसाठा कमी होत असल्याने पुणे शहरातील पाणीपुरवठ्याचा प्रश्न पुन्हा ऐरणीवर आला आहे. शहरात 15 ऑक्टोबरपासून 10% पाणीकपात लागू करण्यात आली असून, दर गुरुवारी संपूर्ण शहराचा पाणीपुरवठा बंद ठेवला जात आहे. आता या कपातीत आणखी वाढ करण्याचा विचार सुरू असल्याने पुणेकरांचे लक्ष महापालिकेच्या आगामी बैठकीकडे लागले आहे.
पुणे शहराला पाणीपुरवठा करणाऱ्या धरणांमधील उपलब्ध साठा जास्तीत जास्त काळ पुरावा, यासाठी जिल्हाधिकाऱ्यांनी जिल्ह्यातील स्थानिक स्वराज्य संस्थांना 20% पाणीकपात करण्याचे निर्देश दिल्याची माहिती आहे. या पार्श्वभूमीवर पुणे महापालिका प्रशासनाकडून पाण्याच्या उपलब्धतेचा आढावा घेतला जात आहे. मात्र, शहरातील पाणीकपात आणखी वाढवली जाणार का, याबाबत अद्याप अंतिम निर्णय झालेला नाही.
महापौर मंजुषा नागपुरे यांनी या विषयावर बैठक आयोजित करण्याच्या सूचना महापालिका आयुक्त नवलकिशोर राम यांना दिल्या आहेत. या बैठकीला पाटबंधारे विभागाच्या अधिकाऱ्यांनाही उपस्थित राहण्यास सांगण्यात आले आहे.
28 ऑक्टोबरच्या बैठकीकडे लक्ष
पाणीकपातीबाबत चर्चा करण्यासाठी 28 ऑक्टोबर रोजी महापालिकेत सर्वपक्षीय बैठक होणार आहे. या बैठकीत धरणांमधील पाणीसाठा, शहराची गरज आणि उपलब्ध पाण्याचे नियोजन यावर चर्चा होण्याची शक्यता आहे. पाणीकपात वाढवण्याबाबत काय निर्णय होतो, हे बैठकीनंतर स्पष्ट होईल. त्यामुळे पुणेकरांना सध्या पाण्याचा वापर जपून करण्याचे आवाहन केले जात आहे.
