पुणे: गेल्या काही दिवसांपासून चर्चेत असलेला पंतप्रधान नरेंद्र मोदी यांचा बारामती दौरा अखेर निश्चित झाल्याची माहिती बुधवारी (दि. २३) समोर आली. २४ ऑक्टोबर रोजी मोदी विद्या प्रतिष्ठानच्या परिसरात उभारण्यात आलेल्या ‘प्रेरणास्थळा’चे उद्घाटन करणार आहेत. याशिवाय विद्या प्रतिष्ठानमध्ये उभारण्यात आलेल्या कृत्रिम बुद्धिमत्ता (एआय) संस्थेची पाहणी आणि त्याबाबतचे सादरीकरणही पंतप्रधानांसमोर होण्याची शक्यता आहे.
या दौऱ्याच्या पार्श्वभूमीवर राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांनी बुधवारी बारामतीतील नक्षत्र गार्डन येथील ‘प्रेरणास्थळा’ची पाहणी केली. त्यानंतर त्यांनी विद्या प्रतिष्ठानच्या मुख्यालयात पदाधिकाऱ्यांसोबत बैठक घेत पंतप्रधानांच्या दौऱ्याच्या तयारीचा आढावा घेतला. यावेळी युवा नेते युगेंद्र पवार, विश्वस्त विठ्ठल मणियार, प्रताप पवार, कृषी विकास प्रतिष्ठानचे मुख्य कार्यकारी अधिकारी प्रा. निलेश नलवडे, विश्वस्त किरण गुजर आणि सचिव नीलिमा गुजर आदी उपस्थित होते.
विद्या प्रतिष्ठान परिसरात उभारण्यात आलेले ‘प्रेरणास्थळ’ तथागत भगवान गौतम बुद्ध यांच्या स्मृती आणि विचारांना समर्पित आहे. शांतता, समता आणि मानवतेचा संदेश नागरिकांपर्यंत पोहोचवण्याचा उद्देश या संकल्पनेमागे आहे. येथे भगवान गौतम बुद्धांचा पुतळा तसेच महापुरुषांच्या चित्रांद्वारे त्यांच्या कार्याचा आणि विचारांचा परिचय करून देण्यात आला आहे.
दरम्यान, विद्या प्रतिष्ठानच्या मुख्यालयात बैठकीसाठी पोहोचलेल्या शरद पवार यांचे अनोख्या पद्धतीने स्वागत करण्यात आले. त्यांच्यासाठी तैनात असलेला ह्युमनॉइड एआय रोबोट पवार यांच्याकडे चालत आला आणि त्याने यांत्रिक हात उंचावून त्यांचे स्वागत केले. पवार यांनी रोबोटकडे पाहून ‘चला’ असे म्हटल्यानंतर तो बाजूला झाला. या स्वागताचा व्हिडिओ सध्या चर्चेचा विषय ठरत आहे.
