“माझ्याकडून चूक झाली. माझा पेपरही चांगला गेला नव्हता” साहिलंच मैत्रिणीसोबत शेवटचं संभाषण! पोलीस तपासातून नवा खुलासा

मुंबई : आयआयटी बॉम्बेतील विद्यार्थी साहिल वाकोडे यांच्या मृत्यूच्या प्रकरणाच्या तपासात महत्त्वाची माहिती समोर आली आहे. मृत्यूपूर्वी साहिलने दुपारी सुमारे २.३० वाजता एका महिला मैत्रिणीसोबत फोनवर संवाद साधल्याची माहिती तपास यंत्रणांच्या सूत्रांनी दिली आहे. या संभाषणानंतर साहिलने तिचे फोन कॉल घेतले नसल्याचे संबंधित मैत्रिणीने तपास अधिकाऱ्यांना सांगितले आहे.

तपास यंत्रणांकडून साहिलच्या मृत्यूआधीच्या काही तासांतील हालचाली आणि त्याच्या संपर्कातील व्यक्तींची माहिती तपासली जात आहे. सूत्रांच्या माहितीनुसार, शेवटच्या फोन संभाषणात साहिलने परीक्षेबाबत तसेच त्याच्यासोबत घडलेल्या घटनेबाबत चिंता व्यक्त केली होती. मात्र, या संभाषणात जातिसूचक टिप्पणी किंवा कथित घटनेशी संबंधित कोणताही उल्लेख झाल्याचे समोर आलेले नाही.

“माझ्याकडून चूक झाली…” असं साहिल मैत्रिणीला म्हणाला

तपास यंत्रणांच्या माहितीनुसार, साहिलने फोनवर मैत्रिणीला, “माझ्याकडून चूक झाली. माझा थर्मोडायनॅमिक्सचा पेपरही चांगला गेला नव्हता आणि आता हे झालं,” असे सांगितल्याचे समोर आले आहे. त्यावर मैत्रिणीने त्याला शांत राहण्याचा आणि संयम ठेवण्याचा सल्ला दिला. तसेच पुढील पेपरच्या तयारीवर लक्ष केंद्रित करण्यास सांगितले.

तपास अधिकाऱ्यांनी या मैत्रिणीचा जबाब नोंदवला आहे. तिच्या माहितीनुसार, साहिलसोबत झालेला हा शेवटचा संवाद होता. त्यानंतर साहिलने तिच्या फोन कॉल्सना प्रतिसाद दिला नाही. या संभाषणात साहिलने कोणतीही जातिसूचक टिप्पणी केली नाही किंवा त्याच्यासोबत घडलेल्या कथित घटनेचा उल्लेख केला नाही, असे मैत्रिणीने सांगितले आहे.

 

मुंबई गुन्हे शाखेकडे तपास

साहिलच्या मृत्यूनंतर सुरुवातीला पवई पोलिस ठाण्यात गुन्हा दाखल करण्यात आला होता. त्यानंतर हे प्रकरण मुंबई गुन्हे शाखेकडे वर्ग करण्यात आले. प्रकरणाची नोंद DCB CID CR No. 124/2026 अंतर्गत करण्यात आली आहे. गुन्हे शाखेकडून साहिलच्या मृत्यूच्या परिस्थितीचा तपास सुरू आहे. तपासादरम्यान CCTV फुटेज, डिजिटल पुरावे आणि संबंधित व्यक्तींचे जबाब तपासले जात आहेत.

मुंबई पोलिसांनी नागरिकांना प्रकरणाबाबत अफवा किंवा चुकीची माहिती पसरवू नये, तसेच तपास पूर्ण होण्यापूर्वी कोणत्याही निष्कर्षापर्यंत पोहोचू नये, असे आवाहन केले आहे. माध्यमांनीही केवळ अधिकृत माध्यमांतून मिळालेल्या माहितीवर विश्वास ठेवावा, असे पोलिसांनी म्हटले आहे.

वडिलांकडून दोन आरोपींच्या अटकेची मागणी

दरम्यान, मंगळवारी साहिलच्या वडिलांनी FIRमध्ये नाव असलेल्या दोन आरोपींना तातडीने अटक करण्याची मागणी केली. कुटुंबाला निष्पक्ष तपास आणि न्याय हवा असल्याचे त्यांनी सांगितले. या प्रकरणात कुटुंबीयांनी केलेल्या आरोपांची तपास यंत्रणांकडून चौकशी सुरू असून, तपास पूर्ण होण्यापूर्वी या आरोपांना अंतिम निष्कर्ष मानता येणार नाही.

प्राध्यापक सूर्यनारायण डुल्ला सुट्टीवर

या प्रकरणात नाव समोर आल्यानंतर IIT बॉम्बेचे प्राध्यापक सूर्यनारायण डुल्ला यांना तपास सुरू असताना सुट्टीवर पाठवण्यात आले आहे. यापूर्वी त्यांना डीन ऑफ अॅडमिनिस्ट्रेटिव्ह अफेअर्स पदावरून हटवण्यात आले होते. साहिलच्या मृत्यू प्रकरणात आत्महत्येस प्रवृत्त केल्याचा आणि जातीय भेदभावाचा आरोप करत त्यांच्याविरोधात गुन्हा दाखल करण्यात आला आहे. हे आरोप सध्या तपासाच्या कक्षेत आहेत.

दरम्यान, IIT बॉम्बेच्या बोर्ड ऑफ गव्हर्नर्सने साहिलच्या मृत्यूच्या पार्श्वभूमीवर १० सदस्यीय उच्चस्तरीय समिती स्थापन केली आहे. या समितीत प्राध्यापक, प्रशासकीय अधिकारी, विद्यार्थी आणि मानसोपचार तज्ज्ञांचा समावेश असल्याचे सांगण्यात आले आहे. साहिलच्या मृत्यूच्या परिस्थितीची चौकशी करून एका आठवड्यात अहवाल सादर करण्याची जबाबदारी समितीवर देण्यात आली आहे.

मुंबई गुन्हे शाखेकडून साहिलच्या मृत्यूपूर्वीच्या घटनाक्रमाची पुनर्रचना करण्याचा प्रयत्न सुरू आहे. परीक्षा केंद्रापासून हॉस्टेलपर्यंतच्या हालचाली, CCTV फुटेज, फोन आणि इतर डिजिटल पुरावे तसेच संबंधित विद्यार्थी आणि प्राध्यापकांचे जबाब तपासले जात आहेत. त्यामुळे महिला मैत्रिणीसोबत झालेला शेवटचा फोन कॉल आणि त्यानंतरच्या घटनांबाबत तपासातून काय निष्पन्न होते, याकडे लक्ष लागले आहे.