पुणे: लोणावळा-पुणे रेल्वे मार्गावर बुधवारी सायंकाळी लोणावळा-पुणे रेल्वे मार्गावर अचानक गोंधळाची परिस्थिती निर्माण झाली. विविध रेल्वे स्थानकांवर प्रवाशांना गाड्यांची प्रतीक्षा करावी लागली. काही गाड्या तब्बल 2 ते 2.5 तास उशिराने धावल्याने नोकरी, व्यवसाय आणि इतर कामांसाठी प्रवास करणाऱ्या नागरिकांची मोठी गैरसोय झाली.
लोणावळा, मळवली, कामशेत आणि तळेगाव या स्थानकांवर या विलंबाचा परिणाम अधिक जाणवला. वेळापत्रकानुसार गाडी येत नसल्याने प्रवाशांमध्ये संभ्रम निर्माण झाला. विशेष म्हणजे विलंबाबाबत पुरेशी माहिती वेळेत मिळत नसल्याच्या तक्रारीही प्रवाशांकडून करण्यात आल्या.
दरम्यान, या संपूर्ण प्रकारामागे मळवली-कामशेतदरम्यान मालगाडीच्या इंजिनमध्ये आलेला तांत्रिक बिघाड कारणीभूत ठरला. मालगाडी अचानक मार्गातच थांबल्यामुळे तिच्या मागून येणाऱ्या प्रवासी गाड्यांच्या वाहतुकीवर परिणाम झाला. पुण्याच्या दिशेने जाणाऱ्या रेल्वे सेवेला याचा थेट फटका बसला.
या व्यत्ययामुळे प्रगती एक्स्प्रेस, डेक्कन क्वीन, सिंहगड एक्स्प्रेस, हुसेन सागर एक्स्प्रेस आणि सिकंदराबाद सुपरफास्ट एक्स्प्रेससह इतर काही गाड्यांच्या वेळेत बदल झाला. लोकल सेवांनाही या तांत्रिक अडचणीचा परिणाम सहन करावा लागला. त्यामुळे मुंबई-पुणे मार्गावर प्रवास करणाऱ्या नागरिकांनाही विलंबाचा सामना करावा लागला.
मालगाडीच्या इंजिनातील बिघाड दूर करण्यासाठी रेल्वे प्रशासनाने तातडीने तांत्रिक पथक कामाला लावले. वाहतूक पूर्ववत करण्यासाठी आवश्यक कार्यवाही सुरू करण्यात आली. दरम्यान, अचानक झालेल्या या घटनेमुळे संध्याकाळच्या वेळेत प्रवास करणाऱ्या नागरिकांना मोठ्या अडचणींचा सामना करावा लागला.
