पुणे: पुणे शहरात गुन्हेगारीच्या घटनेने पुन्हा एकदा खळबळ उडाली आहे. चंदननगर परिसरात शनिवारी 6 डिसेंबरला रात्री 8 वाजण्याच्या सुमारास एका 18 वर्षीय तरुणावर धारदार चाकूने प्राणघातक हल्ला करण्यात आला आहे. या हल्ल्यात एका तरुणाचा जागीच मृत्यू झाला असून, त्याचा मित्र गंभीर जखमी झाला आहे. (Pune Crime)
काय घडलं?
पोलिसांनी दिलेल्या माहितीनुसार, चंदननगर भागातील राजमाता जिजाऊ ऑक्सिजन पार्क येथील गार्डनमध्ये शनिवारी रात्री काही तरुण जमले होते. याच दरम्यान, अज्ञात आरोपींनी सोनू ऊर्फ लखन सकट वाघमारे (वय 18, रा. आंबेडकर वसाहत, चंदननगर) या तरुणावर सपासप वार केले. रक्ताच्या थारोळ्यात पडलेल्या लखनचा काही क्षणातच मृत्यू झाला.
या हल्ल्यात अन्य एक तरुणही जखमी झाला असून, त्याच्यावर खासगी रुग्णालयात उपचार सुरू आहेत.
प्राथमिक तपासात ही घटना जुन्या वादातून आणि परिसरातील वर्चस्वाच्या लढाईतून घडली असावी, असा पोलिसांचा अंदाज आहे. रात्री 8 वाजता वर्दळीच्या ठिकाणी झालेल्या या हत्येमुळे परिसरात एकच खळबळ उडाली आहे.
पोलिसांकडून आरोपींचा शोध सुरू
या घटनेची माहिती मिळताच चंदननगर पोलिसांनी तातडीने घटनास्थळी धाव घेतली, पंचनामा केला आणि मृतदेह शवविच्छेदनासाठी पाठवला.
याप्रकरणी पोलिसांनी अज्ञातांविरुद्ध खुनाचा गुन्हा दाखल केला आहे. आरोपींचा शोध घेण्यासाठी पोलिसांनी वेगवेगळ्या पथकांना रवाना केले. परिसरातील सीसीटीव्ही कॅमेरे आणि प्रत्यक्षदर्शींच्या माहितीच्या आधारे चंदननगर पोलीस अधिक तपास करत आहेत.
