पुणे: मेट्रो टप्पा दोन अंतर्गत (Pune Metro) खडकवासला ते हडपसर–खराडी या मेट्रो मार्गिकेतील (Pune News) हडपसर ते लोणी काळभोर आणि हडपसर बस डेपो ते सासवड रोड या दोन मेट्रो उपमार्गिकांना गुरुवारी राज्य सरकारने मान्यता दिली आहे. या मान्यतेनंतर हे प्रस्ताव अंतिम मंजुरीसाठी केंद्र सरकारकडे पाठवले जाणार आहेत. या दोन मार्गिकांमुळे हडपसर, फुरसुंगी, लोणी काळभोर आणि सासवड या वेगाने वाढणाऱ्या भागांना मेट्रो सेवेशी जोडले जाणार असून वाहतुकीचा वेग वाढण्यास मोठी मदत होणार आहे. यामुळे या परिसरातील नागरिकांना जलद, सुलभ आणि सुरक्षित वाहतूक सुविधा उपलब्ध होणार आहे.
हडपसर ते लोणी काळभोर आणि हडपसर बस डेपो ते सासवड रोड या मार्गिकांना मुख्यमंत्र्यांच्या अध्यक्षतेखालील मंत्रिमंडळ पायाभूत सुविधा समितीच्या बैठकीत नोव्हेंबर महिन्याच्या पहिल्या आठवड्यात मान्यता देण्यात आली होती. त्यानंतर गुरुवारी राज्य सरकारकडून याबाबतचा अधिकृत शासन आदेश जारी करण्यात आला. या दोन्ही उपमार्गिकांची एकूण लांबी सुमारे 16 किलोमीटर असून त्यामध्ये 14 उन्नत मेट्रो स्थानकांचा समावेश आहे. यासाठी अंदाजे 5704 कोटी रुपये खर्च अपेक्षित आहे. हडपसर ते लोणी काळभोर हा मार्ग सुमारे 11.102 किलोमीटर लांबीचा असून हडपसर बस डेपो ते सासवड रोड हा मार्ग 5.557 किलोमीटर लांबीचा असणार आहे.
या प्रकल्पासाठी पुणे महापालिकेकडून जमीन, भूसंपादन आणि पुनर्वसनासाठी 403.36 कोटी रुपये महामेट्रोला दिले जाणार आहेत. डिसेंबर 2029 पर्यंत हे दोन्ही मेट्रो मार्ग पूर्ण करण्याची दक्षता घ्यावी, असे आदेशात नमूद करण्यात आले आहे. हा संपूर्ण उन्नत मेट्रो प्रकल्प महामेट्रोमार्फत राबवला जाणार आहे. या प्रकल्पामुळे या भागातील वाहतूक कोंडी कमी होऊन नागरिकांना दिलासा मिळेल, असा विश्वास व्यक्त केला जात आहे.
दरम्यान, ठाणे जिल्ह्यात मेट्रोच्या कामादरम्यान कल्याण येथे जलवाहिनी फुटल्याने पाणीपुरवठा विस्कळीत झाला आहे. दुरुस्तीच्या कामादरम्यान रस्ता खचण्याची शक्यता असल्याने तो रस्ता वाहतुकीसाठी बंद करण्यात आला आहे. परिणामी बैलबाजार चौकातील के. सी. गांधी शाळा सलग तीन दिवस बंद ठेवण्यात आली आहे. विद्यार्थ्यांसाठी पर्यायी व्यवस्था उपलब्ध करून देण्याची मागणी शाळा प्रशासनाकडून करण्यात आली आहे.
