पुणे: पुण्यातील ऐतिहासिक फुले वाड्यासंदर्भात प्रशासनाने महत्त्वाचा निर्णय घेतला असून यंदापासून या ठिकाणी वटसावित्री पूजेसह कोणत्याही धार्मिक कार्यक्रमांना परवानगी दिली जाणार नाही. पुरातत्व विभागाने याबाबत अधिकृत आदेश जारी केला असून ऐतिहासिक वास्तूचे संवर्धन आणि नियमांचे पालन सुनिश्चित करण्यासाठी हा निर्णय घेण्यात आल्याचे सांगितले जात आहे.
महात्मा ज्योतिराव फुले यांचे वंशज प्रशांत फुले यांनी फुले वाड्यात धार्मिक कार्यक्रमांवर निर्बंध घालण्याबाबत शासनाकडे याचिका सादर केली होती. संरक्षित वारसा स्थळ म्हणून ओळख असलेल्या या वास्तूमध्ये धार्मिक कार्यक्रम आयोजित करणे योग्य नसल्याचा मुद्दा त्यांनी मांडला होता. तसेच ऐतिहासिक वारसा जतन करण्यासाठी आणि संविधानिक तत्त्वांचे पालन करण्यासाठी आवश्यक पावले उचलावीत, अशी मागणीही करण्यात आली होती.
या पार्श्वभूमीवर शासन आणि संबंधित विभागांनी परिस्थितीचा आढावा घेतल्यानंतर फुले वाड्यात धार्मिक कार्यक्रमांवर बंदी घालण्याचा निर्णय घेतल्याची माहिती समोर आली आहे.
गेल्या वर्षी वटपौर्णिमेच्या दिवशी फुले वाड्यात पूजा करण्याच्या मुद्द्यावरून वाद निर्माण झाला होता. या वेळी महिला, सामाजिक कार्यकर्ते आणि पोलिसांमध्ये तणावाचे वातावरण निर्माण झाले होते. या घटनेची दखल घेत यंदा अशा प्रकारची परिस्थिती निर्माण होऊ नये, यासाठी प्रशासनाने आधीच खबरदारीची भूमिका घेतली आहे.
पुरातत्व विभागाने जारी केलेल्या आदेशात संरक्षित ऐतिहासिक वास्तूंमध्ये कोणतेही धार्मिक अथवा सार्वजनिक कार्यक्रम आयोजित करताना लागू नियमांचे पालन करणे बंधनकारक असल्याचे नमूद केले आहे. वारसा स्थळांचे संरक्षण आणि त्यांची मूळ ओळख कायम राखणे हा या निर्णयामागील प्रमुख उद्देश असल्याचेही स्पष्ट करण्यात आले आहे.
दरम्यान, या निर्णयानंतर फुले वाडा पुन्हा एकदा चर्चेच्या केंद्रस्थानी आला आहे. विविध सामाजिक संघटना, राजकीय पक्ष आणि नागरिकांकडून या निर्णयावर वेगवेगळ्या प्रतिक्रिया उमटण्याची शक्यता व्यक्त केली जात असून पुढील काही दिवसांत यावर अधिक चर्चा होण्याची चिन्हे आहेत.
