पुणे: राज्यातील शिक्षण विभागात मोठा खळबळजनक प्रकार समोर आला आहे. बनावट ‘शालार्थ आयडी’ तयार करून शासनाची 160 कोटी रुपयांपेक्षा जास्त रकमेची फसवणूक केल्याप्रकरणी विशेष तपास पथकाने (SIT) मोठी कारवाई केली आहे. या प्रकरणात जळगावचे तत्कालीन माध्यमिक शिक्षणाधिकारी शशिकांत भाऊराव हिंगोणेकर (वय 66) यांना धुळ्यातून अटक करण्यात आली आहे. न्यायालयाने त्यांना 27 तारखेपर्यंत पोलीस कोठडी सुनावली आहे.
एसआयटीच्या तपासात या प्रकरणातील अनेक गंभीर बाबी समोर आल्या आहेत. हिंगोणेकर यांनी 2022 ते 2025 या काळात जळगाव येथे शिक्षणाधिकारी म्हणून काम करताना पदाचा गैरवापर केल्याचा आरोप आहे. कोणतीही आवश्यक कागदपत्रे आणि अधिकृत प्रक्रिया पूर्ण न करता त्यांनी 259 शिक्षक आणि शिक्षकेतर कर्मचाऱ्यांना नियमबाह्य पद्धतीने वैयक्तिक मान्यता दिल्याचे तपासात आढळून आले आहे.
त्यानंतर या कर्मचाऱ्यांची माहिती शालार्थ प्रणालीमध्ये चुकीच्या पद्धतीने नोंदवण्यात आली. या बनावट नोंदींच्या आधारे वेतन आणि इतर आर्थिक लाभ देण्यात आल्याचा आरोप आहे. त्यामुळे शासनाच्या मोठ्या निधीचे नुकसान झाल्याचे तपासात स्पष्ट झाले आहे.
नाशिक विभागातील जळगाव, नाशिक, धुळे आणि नंदुरबार या जिल्ह्यांमध्ये मोठ्या प्रमाणात गैरप्रकार झाल्याचे समोर आले आहे. तपासानुसार, 842 पेक्षा जास्त कर्मचाऱ्यांच्या नियुक्त्या मागील तारखांपासून दाखवण्यात आल्याचा संशय आहे. या संपूर्ण प्रकरणामुळे शासनाचे 160 कोटी रुपयांहून अधिक नुकसान झाल्याचा प्राथमिक अंदाज आहे.
या प्रकरणी नाशिकरोड पोलीस ठाण्यात विविध गंभीर कलमांखाली गुन्हा दाखल करण्यात आला आहे. या घोटाळ्यात काही संस्थाचालक, मुख्याध्यापक आणि इतर संबंधित अधिकारी सहभागी असल्याचा संशय तपास यंत्रणांना आहे.
एसआयटीचा तपास पुढे जात असून, आतापर्यंत या प्रकरणात सुमारे 1200 जणांचा सहभाग असल्याची माहिती समोर आली आहे. माजी शिक्षणाधिकाऱ्याच्या अटकेनंतर शिक्षण विभागात मोठी खळबळ उडाली असून, आगामी काळात आणखी काही व्यक्तींवर कारवाई होण्याची शक्यता आहे.
