बारामती : शेतातील मातीचा भराव सुरू ठेवण्यासाठी आणि कारवाई न करण्याच्या मोबदल्यात १० हजार रुपयांची लाच मागितल्याप्रकरणी वनपालाला लाचलुचपत प्रतिबंधक विभागाने (एसीबी) रंगेहात पकडले. जहीर सिराज शेख (वय ४७) असे ताब्यात घेतलेल्या वनपालाचे नाव आहे. २५ ऑक्टोबर रोजी माळेगाव येथे ही कारवाई करण्यात आली. तक्रारदाराकडून उर्वरित ६ हजार रुपये स्वीकारताना त्याला पकडण्यात आले.
तक्रारदार हे ६० वर्षीय शेतकरी असून, त्यांची कोऱ्हाळे खुर्द येथे चार हेक्टर शेतजमीन आहे. पावसामुळे शेतातील माती नीरा नदीत वाहून गेल्याने ते नदीपात्रातील माती शेतात टाकत होते. या कामादरम्यान २६ सप्टेंबर रोजी वनपाल जहीर शेख यांनी काम बंद करण्यास सांगितले. संबंधित जागा वनविभागाच्या मालकीची असल्याचे सांगून कारवाई करण्याची भीती दाखवल्याचा आरोप तक्रारदाराने केला आहे.
काम सुरू ठेवण्यासाठी आणि कारवाई न करण्यासाठी शेख यांनी स्वतःसाठी तसेच त्यांच्या सहकारी महिला कर्मचाऱ्यासाठी १० हजार रुपयांची लाच मागितल्याची तक्रार करण्यात आली. त्यापैकी चार हजार रुपये त्याच दिवशी स्वीकारल्याचा आरोप आहे. उर्वरित सहा हजार रुपये दिल्याशिवाय काम सुरू करू नये, असे सांगण्यात आल्याचे तक्रारीत नमूद आहे.
तक्रारीच्या आधारे पुणे लाचलुचपत प्रतिबंधक विभागाने २३ ऑक्टोबर रोजी लाच मागणीची पडताळणी केली. या कारवाईदरम्यान पंचांसमक्ष शेख यांनी यापूर्वी चार हजार रुपये स्वीकारल्याचे मान्य करून उर्वरित सहा हजार रुपयांची मागणी केल्याचे निष्पन्न झाल्याची माहिती विभागाने दिली.
२५ ऑक्टोबर रोजी माळेगाव येथील आयटीआयसमोरील हॉटेल शिवकृपा येथे सापळा रचण्यात आला. तक्रारदाराकडून सहा हजार रुपये स्वीकारताना दुपारी २.१७ वाजता शेख यांना रंगेहात ताब्यात घेण्यात आले. त्यांच्याविरुद्ध भ्रष्टाचार प्रतिबंधक कायदा १९८८ मधील कलम ७ अन्वये माळेगाव पोलीस ठाण्यात गुन्हा दाखल करण्याची प्रक्रिया सुरू असल्याचे एसीबीने नमूद केले.
ही कारवाई पोलीस निरीक्षक संतोष पाटील यांच्या नेतृत्वाखाली करण्यात आली. पोलीस उपअधीक्षक सतीश वाळके यांच्या पर्यवेक्षणाखाली पथकाने काम केले. लाच मागणी किंवा भ्रष्टाचारासंबंधी तक्रार असल्यास नागरिकांनी लाचलुचपत प्रतिबंधक विभागाशी संपर्क साधावा, असे आवाहन विभागाने केले आहे.
