मुंबई: मराठा समाजाच्या शैक्षणिक आणि आर्थिक उन्नतीसाठी राज्य सरकारने महत्त्वाचा निर्णय घेतला असून आता मराठा समाजातील विद्यार्थ्यांनाही इतर मागासवर्गीय (OBC) विद्यार्थ्यांप्रमाणे विविध शैक्षणिक सवलती आणि योजनांचा लाभ मिळणार आहे. या निर्णयामुळे उच्च शिक्षण घेणाऱ्या तसेच व्यावसायिक अभ्यासक्रमांमध्ये प्रवेश घेणाऱ्या विद्यार्थ्यांना मोठा आर्थिक आधार मिळण्याची अपेक्षा व्यक्त केली जात आहे. (Maratha Educational Benefits)
शासनाच्या नव्या निर्णयानुसार मराठा समाजासाठी ओबीसी प्रवर्गाच्या धर्तीवर 8 प्रमुख योजना लागू करण्यात येणार आहेत. यामध्ये दहावीनंतरच्या शिक्षणासाठी दिली जाणारी शालांत परीक्षोत्तर शिष्यवृत्ती योजना मराठा विद्यार्थ्यांनाही उपलब्ध होणार आहे. तसेच इयत्ता 9 वी ते 12 वीपर्यंतच्या विद्यार्थ्यांसाठी असलेली माध्यमिक आणि उच्च माध्यमिक शिष्यवृत्ती योजनाही या प्रवर्गाला लागू करण्यात आली आहे.
रोजगाराच्या संधी वाढाव्यात यासाठी वाहन चालक आणि वाहक प्रशिक्षण योजनेचाही लाभ मराठा समाजातील तरुणांना दिला जाणार आहे. याशिवाय विविध शैक्षणिक शुल्क आणि इतर संबंधित खर्चाची प्रतिपूर्ती करण्याची योजनाही लागू करण्यात आली असून पात्र विद्यार्थ्यांना त्याचा फायदा मिळणार आहे.
महाराष्ट्रातील रहिवासी असलेल्या आणि परराज्यातील अनुदानित किंवा विनाअनुदानित व्यावसायिक अभ्यासक्रमांमध्ये प्रवेश घेतलेल्या मराठा विद्यार्थ्यांनाही या योजनांचा लाभ घेता येणार आहे. तसेच राज्यातील सर्व मान्यताप्राप्त व्यावसायिक अभ्यासक्रमांसाठी मराठा समाजातील विद्यार्थ्यांना शैक्षणिक सवलतींसाठी पात्र मानण्यात येणार आहे.
केंद्रीभूत प्रवेश प्रक्रिया पूर्ण झाल्यानंतर महाविद्यालयांमध्ये रिक्त राहिलेल्या जागांवर संस्थास्तरावर प्रवेश घेणाऱ्या विद्यार्थ्यांनाही या सवलती लागू राहतील. त्यामुळे विविध कारणांमुळे नियमित प्रवेश प्रक्रियेत सहभागी न झालेल्या विद्यार्थ्यांनाही याचा फायदा मिळू शकणार आहे.
या निर्णयातील सर्वात महत्त्वाची बाब म्हणजे भविष्यात ओबीसी प्रवर्गासाठी ज्या नव्या शैक्षणिक सवलती किंवा सुविधा जाहीर केल्या जातील, त्या स्वतंत्र आदेशाशिवाय मराठा समाजालाही आपोआप लागू होतील. त्यामुळे मराठा समाजातील विद्यार्थ्यांना दीर्घकालीन स्वरूपात शैक्षणिक लाभ मिळण्याचा मार्ग मोकळा झाला आहे.
