पुणे: पुण्यातील खराडी परिसरात गॅस सिलेंडरच्या स्फोटामुळे एका कुटुंबावर दुःखाचा डोंगर कोसळला आहे. सिलेंडर बदलत असताना झालेल्या गॅस गळतीनंतर भीषण आग आणि स्फोट होऊन गंभीर भाजलेल्या तिघांचा उपचारादरम्यान मृत्यू झाला. या दुर्घटनेत घरातील मोठ्या प्रमाणावर नुकसान झाले असून परिसरात हळहळ व्यक्त केली जात आहे.
ही घटना शुक्रवारी सकाळी सुमारे 9.15 वाजण्याच्या सुमारास खराडीतील खांदवेनगर येथील फॉर्च्युन सिटी सोसायटीमधील एका घरात घडली. मृतांमध्ये विष्णु मुंजाजी गिते (वय 60), पांडुरंग विष्णु गिते (वय 35) आणि वृंदावनी विष्णु गिते (वय 55) यांचा समावेश आहे. तर राजेश्री पांडुरंग गिते आणि 5 वर्षीय निहारिका गिते या दुर्घटनेतून बचावल्या असून त्यांना किरकोळ दुखापत झाली आहे.
अग्निशमन विभागाने दिलेल्या माहितीनुसार, घरातील स्वयंपाकघरात वापरातील गॅस सिलेंडर संपल्यानंतर नवीन सिलेंडर जोडण्याचे काम सुरू होते. त्याचवेळी नव्या सिलेंडरमधून मोठ्या प्रमाणावर गॅस गळती होऊ लागली. काही क्षणांतच सिलेंडरला आग लागल्याचे लक्षात येताच पांडुरंग गिते यांनी प्रसंगावधान दाखवत सिलेंडर घराबाहेर फेकण्याचा प्रयत्न केला. मात्र, तोपर्यंत घरभर पसरलेल्या गॅसमुळे अचानक मोठा स्फोट झाला आणि संपूर्ण घराला आग लागली.
या स्फोटात स्वयंपाकघरात उपस्थित असलेले तिघे गंभीर भाजले. त्यांना तातडीने ससून रुग्णालयात दाखल करण्यात आले. मात्र, उपचार सुरू असतानाच दुपारच्या सुमारास तिघांचाही मृत्यू झाला. सुदैवाने त्या वेळी घरातील सुन बाथरूममध्ये आणि 5 वर्षांची मुलगी गॅलरीत असल्यामुळे त्यांचा जीव वाचला.
घटनेची माहिती मिळताच खराडी, येरवडा आणि धानोरी येथील अग्निशमन दलाच्या गाड्या घटनास्थळी दाखल झाल्या. जवानांनी तातडीने आग नियंत्रणात आणली. मात्र, तोपर्यंत घरातील फर्निचर, टीव्ही, विद्युत वायरिंग, गिझर, दरवाजे आणि इतर साहित्य जळून खाक झाले होते. हॉलचे सिलिंग पूर्णपणे जळाले असून स्फोटाच्या तीव्रतेमुळे घरातील अनेक वस्तूंचे तुकडे झाले. या दुर्घटनेत एकाच कुटुंबातील तिघांचा मृत्यू झाल्याने परिसरात शोककळा पसरली आहे.
