Beed Crime : मस्साजोगचे सरपंच संतोष देशमुख यांच्या हत्येनंतर बीडमधील कायदा-सुव्यवस्थेबाबत निर्माण झालेल्या प्रश्नचिन्हाचा मुद्दा पुन्हा एकदा ऐरणीवर आला आहे. वर्षभर उलटूनही परिस्थितीत काही सुधारणा झाली का, असा प्रश्न उपस्थित करणारी आणखी एक धक्कादायक घटना जिल्ह्यात समोर आली आहे. (Latest Marathi Crime News)
शरीर काळे-निळे होईपर्यंत मारहाण
गेवराई तालुक्यातील नांदगाव ग्रामपंचायत शिपाई जालिंदर सुरवसे यांना गावातील काही गुंड प्रवृत्तीच्या व्यक्तींनी जातीवाचक शिवीगाळ करत लोखंडी रॉड, काठ्या आणि लाथाबुक्क्यांनी निर्दयपणे मारहाण केल्याचा धक्कादायक प्रकार उघड झाला आहे. या हल्ल्यात सुरवसे गंभीर जखमी झाले असून त्यांच्या अंगावर ठिकठिकाणी वळ उमटले आहेत. शरीर काळे-निळे होईपर्यंत त्यांना मारहाण करण्यात आल्याची माहिती समोर आली आहे.
हेही वाचा: लोणावळ्यात भीषण अपघात! क्षणात Swift कारचा चेंदामेंदा; गोव्यातून आलेल्या दोन मित्रांवर काळाचा घाला!
कारण अद्याप अस्पष्ट
हल्ल्यामागील नेमके कारण अद्याप स्पष्ट झालेले नाही. त्यांच्या अधिकारातील एखाद्या कामावरून वाद निर्माण झाला की इतर कोणते कारण होते, याबाबत पोलिसांनी अद्याप अधिकृत माहिती दिलेली नाही. घटनेनंतर जखमी सुरवसे यांना तातडीने रुग्णालयात दाखल करण्यात आले असून तेथे त्यांच्यावर उपचार सुरू आहेत.
या प्रकरणी सुरवसे यांच्या आई आणि बहिणीने तलवाडा पोलीस ठाण्यात तक्रार दिली असून संबंधित गावगुंडांविरुद्ध गुन्हा दाखल करण्यात आला आहे. पोलिसांनी तपास करत पुढील कार्यवाही सुरू केली आहे.
ग्रामसेवकावर झालेल्या या अमानुष हल्ल्यामुळे परिसरात मोठी खळबळ उडाली आहे. ग्रामस्थांमध्ये भीतीचे वातावरण पसरले असून कठोर कारवाईची मागणी जोर धरत आहे.
