बारामती : बारामती औद्योगिक (Baramati Crime) वसाहत परिसरात एका (Baramati News) महिलेवर भरदिवसा दरोड्याची घटना घडल्याने खळबळ उडाली आहे. वंजारवाडी पुलाजवळ दुचाकीवरून जाणाऱ्या महिलेची दुचाकी अडवून दोन अज्ञात व्यक्तींनी धारदार शस्त्राचा धाक दाखवत तिच्याकडील सोन्याचे दागिने लुटून पळ काढला. ही घटना मंगळवारी दुपारी सुमारे 1.15 वाजण्याच्या सुमारास पालखी महामार्गावर घडली.
या प्रकरणी रूपाली किशोर रुपनवर, रा. रुई, बारामती यांनी बारामती तालुका पोलीस ठाण्यात फिर्याद दिली आहे. रूपाली रुपनवर यांची वंजारवाडीतील जगदंबानगर परिसरात तन्वी फुट्स नावाची कंपनी आहे. त्या मंगळवारी दुपारी स्कूटीवरून कंपनीकडे जात होत्या. पालखी महामार्गावरील वंजारवाडी पुलाजवळ पोहोचताच पाठीमागून एका दुचाकीवरून आलेल्या दोन अज्ञात व्यक्तींनी त्यांच्या वाहनासमोर दुचाकी आडवी लावून त्यांना थांबवले.
दुचाकीवरील मागे बसलेला आरोपी खाली उतरून थेट रूपाली रुपनवर यांच्या स्कूटीची चावी काढून घेतली. त्यानंतर धारदार शस्त्राने स्कूटीच्या सीटवर वार करत महिलेला धमकावण्यात आले. दागिने न दिल्यास जीवे मारण्याची धमकी देण्यात आली. घाबरलेल्या महिलेनं हातातील सोन्याच्या बांगड्या आणि अंगठी काढून आरोपींना दिली. त्यानंतर हे दोघे पालखी महामार्गावरून पाटसच्या दिशेने वेगाने पसार झाले.
या घटनेत फिर्यादीकडील सुमारे 3 लाख 42 हजार रुपये किंमतीच्या 38 ग्रॅम वजनाच्या सोन्याच्या बांगड्या आणि 27 हजार रुपये किंमतीची सोन्याची अंगठी, असा एकूण 3 लाख 70 हजार रुपयांचा ऐवज लुटण्यात आला आहे. बारामती तालुका पोलीस या प्रकरणाचा अधिक तपास करत आहेत.
